وصفة فطار فرنسية: توست بالتفاح والقرفة
زهقتي من عمل فطار تقليدي كل يوم؟ عندنا وبس في وصفات فطار جديدة هتغيري وتجددي نوع الفطار التقليدي اللي بتقدميه لأسرتك كل يوم، الوصفة اللي هنتكلم عنها هتاخد منك حوالي 10 دقايق بس وتكفي تقريباً من 3 لـ 4 أشخاص، لكن ماتقلقيش لو أسرتك أكبر من كده الموضوع سهل، ضاعفي كمية المقادير كلها واستمتعوا كلكم سوا بصنف جديد على السفرة هتعمليه على الطريقة الفرنسية اللذيذة هتحسوا معاه بالتجديد وأكيد هتعيشوا تجربة ممتعة ومختلفة!
لو عندك أطفال سنهم صغير غالباً هيكون عندهم مشكلة مع وجبة الفطار وأكيد زينا كلنا بيغلبوكي عشان يرضوا ياكلوا، لكن مع الوصفة ديه تأكدي إنك مش هتعاني من المشكلة ديه تاني لأنها أكيد هتعجبهم، الميزة اللي فيها إنها بيتحط فيها سكر فطعمها بيبقى حلو زي الحلويات اللي بيشتروها وبيحبوا ياكلوها طول الوقت، لكن طبعاً ديه أحسن وأأمن على صحتهم.
المقادير:
- تفاحتين متوسطين.
- بيضتين.
- 1/2 كوباية لبن.
- 1/3 كوباية دقيق.
- 3/4 كوباية سكر بني.
- 4 معالق كبار زبدة.
- 1/2 معلقة فانيليا صغيرة.
- معلقة قرفة صغيرة.
- 6 شرايح عيش أبيض أو بني (توست).
طريقة تحضير الفطار على الطريقة الفرنسية:
- قشري التفاح وقطعيه شرايح.
- سخني الزبدة في طاسة على البوتجاز على نار هادية وحطي فيها التفاح والسكر واقعدي قلبيهم لحد ما السكر يدوب وحطي عليهم نص كمية القرفة (1/2 معلقة) ونص كمية الفانيليا (1/4 معلقة) وقلبيهم وسيبي النار هادية زي ما هي، استمري في التقليب لمدة من 6 لـ 8 دقايق وبعدين ارفعيهم من على النار وسيبيهم يبردوا.
- اضربي البيض مع الدقيق واللبن وضيفي عليهم الكمية الباقية من القرفة والفانيليا.
- سقي العيش في الخلطة ديه بعدين حمصيه في شوية زيت على نار هادية، سيبيه من دقيقة لدقيقتين على كل وش، هتلاقي قوامه بينشف شوية ولونه بيغمق بس حاجة بسيطة عشان مايتحرقش، طلعيه بعد كده على مناديل ورق يصفي الزيت وبعدين رصيه في طبق التقديم.
- هاتي التفاح بالقرفة اللي عملناهم في الأول وصبيهم على وش العيش المحمص، وبكده يكون الفطار جاهز، ممكن تقدمي معاه عصير برتقال فريش وطبق فاكهة طازة.
Loading ...
