نصائح لشراء ورق حائط مميز وعصري

ورق الحائط من الحاجات المميزة جداً في الديكور واللي رجع موضة تاني لتزين ديكورات البيوت بعد فترة إختفاء بس رجع بقوة وبأشكال وألوان وأستايلات مختلفة ومتطورة زي ورق حائط (3D) ومع الاختيارات الكتير الموجوده والتطور الكبير والملحوظ في أشكال ورق الحائط وسهولة استخدامه وتركيبه طبيعي تحسي إنك عايزة تستخدميه في تغير شكل ديكورات بيتك.

نصائح مهمة عشان تسهل عليكي شرا ورق الحائط وتقدري تستمتعي بشكل ديكور مميز لبيتك:

1. مهم جداً تعرفي مقاسات الأوض كويس جدا قبل ماتشتري ورق الحائط عشان تقدري تحددي بالظبط عدد رولات ورق الحائط اللي هتحتاجيها، كمان لو في اوضة فيها أكتر من شباك لازم تحسبوا مساحة الشبابيك عشان متشتريش ورق حائط بزيادة وتبقى خسرتي فلوس ولا تشتريه بعدد قليل يحسسك أن ناقصك حاجات لسه.
2. قبل ماتشتري ورق الحائط لازم تسألي على طريقة تنضيفة وتتأكدي إن نوع ورق الحائط اللي هتحطيه في غرف الأطفال والممرات وغرف السفرة ينفع تتنضف بالمية، عشان ميبوظش مع أول مرة تنضفيه فيها وتبقى حاسة إنك ضيعتي فلوسك على الفاضي.
3. مهم أوي تبقى عارفة قبل ماتشتري ورق الحائط مساحة المكان اللي هتحطيه فيه، يعني مثلا لو الاوضة مساحتها صغيرة مش هينفع تستخدمي الأنواع اللي النقوشات فيها بتكون كبيرة وواضحة عشان بتظهر إن مساحة الأوضة صغيرة وضيقة، عشان كده الاحسن إنك تستخدمي الأنواع اللي النقوشات بتكون صغيرة عشان تحسسك بوسع الأوضة اللي بتتمنيه.
4. كمان لازم تخلي بالك كويس أوي وأنتي بتشتري ورق الحائط من تناسق ألوانه، عشان في أنواع لون الأرضية نفسها بيكون مختلف ومش لايق على لون النقوشات اللي فيه، فكده هيحسسك بزحمة وعدم التناسق.
5. راعي كمان إن لو عندك غرف مفتوحة على بعض زي مثلا السفرة والصالون وعايزة تحطي فيها ورق حائط يبقى لازم يكون من نفس اللون والنقشة عشان ميبقاش الشكل مبالغ فيه ومش حلو.
6. التغيير طبعا مطلوب في كل وقت وأكيد انتي مش ضامنة أمتى هتحبي تغيري شكل ورق الحائط اللي ركبتيه، عشان كده لازم تسألي البياع عن طريقة إزالة ورق الحائط اللي هتشتريه وياريت لو تختاري الأنواع اللي بتكون سهلة في الإزالة والتركيب.
7. مهم برضه قبل ماتشتري ورق حائط (3D) تبقي عارفة بالظبط المكان اللي هيتركب فيه، كمان بلاش يتحط على أكتر من حيطة في نفس الأوضة كفاية جداً يتحط على حيطة واحدة بس في الأوضة بس أهم حاجة إنك تختاري لون وشكل يكون لايق على لون دهانات الحيطة في الأوضة.

ودي كانت نصايح مهمة هتفيدك وإنتي بتشتري وتختاري ورق الحائط ، بنتمنى تكوني استفادتي منها وساعدتك تكوني فكرة عن الأنواع اللي هتستخدميها.