نصائح لتجديد ديكور المطبخ
ستات كتير بتشتكي من إحساسها بالزهق والملل من كتر الوقوف في المطبخ وبيكونوا محتاجين يعملوا أي تجديد في ديكور المطبخ عشان يتخلصوا من إحساس الزهق اللي بيحسوا بيه.
عشان إحنا عارفين إن المطبخ هو أكتر مكان بتقضي فيه وقتك وقد إيه بتكوني محتاجة تغيري في شكله اللي متعودة عليه، حبينا أنهارده نقولك على شوية نصايح تقدري بيها تجددي من ديكور مطبخك بأقل التكاليف عشان تبقي قادرة تعملي كل مهماتك في المطبخ من غير ماتحسي بالملل والزهق.
(أعرفي الفرق بين أنواع المطابخ المختلفة)
أفكار لتجديد ديكور مطبخك:-
- ايه رأيك تجيبي شوية زرعات صغيرة من الأعشاب اللي بتستخدميها في الطبخ وتحطيها على شباك المطبخ أو تحطيها في بلكونة مطبخك عشان تبقى معرضة للهوا ومتدبلش، الأعشاب دي زي النعناع والحلبة والريحان والروزماري (إكليل الجبل) هتضيفلك ريحة ومنظر جميل في مطبخك وفي نفس الوقت هتطبخي بأعشاب طازة.
- جربي كمان تغيري أماكن الأجهزة في المطبخ، يعني مثلا حطي التلاجة بدل الديب فريزر أو غسالة الأطباق بدل المايكروويف، التغيرات دي هتحسسك بتغير في ديكور مطبخك.
- ولو عايزة تحسي بتغيير أكبر ممكن تغيري في شكل أرضية المطبخ بإنك تحطي سجادة بس تكون من نوع السجاجيد البلاستيك عشان تبقى سهلة في تنضيفها وهتلاقي منها أشكال كتير هتليق على مطبخك.
- تقدري كمان تعملي ميزانية صغيرة تشتري بيها شوية حاجات تجددي بيها ديكور مطبخك وفي نفس الوقت تساعدك تحسي بمتعة أكبر في الوقت اللي بتقضيه فيه زي مثلا:
(راديو أو كاسيت صغير- طقم توابل جديد- سلة قمامة جديدة- تشتري حلل جديدة وتستغنى عن اللي عندك (بس ده في حالة إن الحلل دي تكون اتعرضت فعلا للتلف زي الصدا والحرق)- تلزقي استيكرات عليها أشكال مضحكة ومميزة على الثلاجة – تغيري مفارش الأدراج).
كل الحاجات دي هتساعدك جدا في تغير وتجديد ديكور مطبخك وهتخليكي تحسي براحة ومتعة أكتر بالوقت اللي بتقضيه في المطبخ أهم حاجة بس متستعجليش في التغير وأبدأي واحدة واحدة حسب ميزانيتك، المهم إنك تحسي بتغير ولو بسيط.
بنتمنى تكوني إستفادتي من مقالنا وأفكارنا ساعدتك في تجديد ديكور المطبخ زي ماإنتي حابة.
Loading ...
