نسقي لبسك من دائرة الالوان زى المحترفين

بالنسبة لينا اللبس ده مشكلة كبيرة وممكن نلغى خروجة أو مشوار بسبب إن إحنا مش عارفين نظبط لبسنا كويس ولا نختار الألوان صح، وأوقات كتير أووى بنروح علي اللون الأبيض أو الأسود ونوفقهم مع ألوان تانية ففجأة بنلاقى دولابنا كله بقي شبه بعضه، عشان كده هنتكلم عن حاجة بسيطة بس هتفرق معانا كتير في اختيارتنا وفي تنسيق الملابس هي دائرة الالوان:-

دائرة الالوان بتديكى اختيارات كتير وتدريجات مختلفة لنفس اللون عشان يكون عندك احتيارات كتير تقدرى بيها تحولي لبسك من لبس تقليدي عادي للبس كله مليان إشراقة وحيوية.

فيه كذا طريقة عشان تقدري تحددي بيها الألوان المناسبة من دائرة الالوان:-

– أول طريقة : الألوان المتتالية:-

اختاري اللون اللي أنتي عايزة تلبسيه و واختاري لونين سابقين أو لونين متتاليين ، زي مثلاً لو اختارتي اللون الأزرق هتلاقي من ناحية اللون اللبني والأزرق الفاتح ومن الناحية التانية الأزرق الغامق والموف، بالطريقة ديه هتختاري ألوان متناسقة وهادية لأنها درجات بتكون قريبة من بعضها.

– تاني طريقة : الألوان المكملة:-

هتختاري لون معين وبدل ما تشوفي الألوان اللي جنبيه شوفي اللون اللي قدامه في دائرة الالوان ، يعني لو اختارتي اللون الأزرق السماوي هيكون المقابل ليه اللون البرتقالي الفاتح أو لو اخترتي اللون البنفسجي هيكون المقابل ليه في دائرة الالوان اللون الأخضر الغامق وهكذا، الألوان المكملة ألوان جريئة ومثيرة وهتخليكي تحسي بتغيير كبير غير الألوان اللي اتعودتي عليها.

– تالت طريقة : شكل المثلث في دائرة الالوان:-

طريقة مختلفة شويه وهي لو عندك دائرة الالوان مرسومة ارسمي عليها مثلث، وطبعاً المثلث ليه 3 رؤوس فكل رأس في المثلث هي الألوان اللي تقدري تلبسيها وتنسقيها مع بعضها زي اللون الأصفر مع اللون الأحمر مع الأزرق الفاتح ، الطريقة دي هتديكي مجموعة ألوان رائعة ومختلفة وجريئة هتحبي إنها تكون موجودة في دولابك.

نصائح مهمة لتنسيق لبسك بسهولة:-

•  خلي دائرة الالوان معاكي وأنتي بتشتري لبسك علي التليفون أو ارسميها علي ورق هتساعدك كتير وهتوفر عليكي لف كتير و واقفة طويلة قدام الدولاب عشان مش عارفه تلبسي ايه.
• وعشان تكون طلتك أحسن وأشيك، حاولي علي قد ما تقدري ما تزوديش عن 3 ألوان، وممكن تستخدمي لون واحد بدرجتين مختلفتين زي طريقة الألوان المتتالية .
• لو هتلبسي مخطط بالأسود والأبيض، اللونين دول بيليق عليهم ألوان كتير جداً زي ألوان الباستيل والأخضر والأزرق والأحمر والأصفر المستردة وألوان تانية كتير من الموجودة في دائرة الالوان.
• ولو هتلبسي مشجر أو فيه أي شكل اختاري اللون الأقل ظهور عشان يكون لون البلوزة أو البنطلون أو الطرحة.
• تقدري بعد ما تختاري لونين أو تلاتة من دائرة الالوان ممكن تزودي اللون الأبيض بدرجاته أو الأسود أو البني لأنهم من الألوان المحايدة اللي تقدري تلبسيها مع كل الدرجات.

كمان تقدري تستعيني بدائرة الالوان في تنسيق ألوان ملابسك مع الحجاب وتختاري لون الطرحة المناسب للبس من خلالها زي ما اتكلمنا قبل كده في موضوع تنسيق الالوان فى الملابس للمحجبات.

خليكي دايماً جريئة في إنك تجددي في الألوان اللي بتلبسيها وتجربي حاجات جديدة عشان متضايقيش من لبسك لأن تغيير حاجة بسيطة في الطقم هتغيير شكله خالص زي لون الطرحة أو لون الاسكارف أو لون الشنطة هتحسي إن الطقم بقي جديد.