مظاهر وأسباب عصبية الاطفال

في أمهات كتير بتعاني من مشكلة عصبية الاطفال ومش بتبقى عارفه إزاي تتعامل معاهم، ولأن في أطفال عشان تقدر توصل للشئ اللي هي عايزاه فبتدأء تعمل حركات عشان الأمهات توافق على طلباتهم، يعني مثلاً ممكن الأم تلاقي الطفل بيعيط جامد أو بيدب برجله في الأرض أو ممكن يضرب برأسه على الحائط، وبتبقى النتيجة طبعاً إن الأم بتوافق على الطلب عشان يبطل عياط ويبطل عصبية،في مقالتنا هنقولك على المظاهر والأسباب اللي تخلي الأطفال تبقى عصبية.

مظاهر عصبية الاطفال:-

• من مظاهر العصبية عند الأطفال لما تحسي أن الطفل بدأ يتعامل مع الناس اللي حاوليه بعدوانية وبدأ يضرب أو يعض وديه من المظاهر الجسدية.
• وممكن كمان لما تلاقيه بيعيط جامد وبيصرخ وكمان بتلاقيه بيقول ألفاظ مهينة.
• ومن المظاهر اللي دايماً بتبقى ملحوظة بشكل واضح عند الأطفال هي التخريب يعني مثلاً ممكن تلاقيه بيكسر الحاجات اللي حواليه أو مثلاً يرمي أكله على الأرض أو المايه وكمان ممكن إذا عندك حيوانات أليفة في البيت تلاقيه بيتعامل معاها بشكل عنيف.

أسباب عصبية الاطفال:-

• تعالي بقى نقولك على الأسباب اللي بتأدي لعصبية الاطفال لأنك ممكن تكوني أنتي السبب في عصبية طفلك فلازم تخلي بالك كويس إنك ماتتعامليش مع طفلك بقسوة ولازم طبعاً تبقي سايبه ليه مساحة بسيطة من الحرية وماتحرميهوش من الحاجات اللي بيحبها غير إذا عمل حاجات غلط عشان ماتنميش عنده روح الإنتقام فيحاول دايماً إنه يكسر حاجات في البيت أو يضرب الناس اللي حاوليه.
• وكمان من الأسباب اللي بتوصله لكده هي الشعور بالنقص يعني لما يحس بالتجاهل من الناس اللي حاوليه فبيبدأ يعمل أي حركات عشان يلفت نظر الناس اللي حاوليه سواء بالعياط أو الصريخ أو ممكن كمان إذا فضلتي دايماً تتكلمي عن سلوكه العصبي مع الناس فكده هو بيتحول لطفل عدواني.
• خلي بالك إن الأطفال بتحب إنها يكون ليها شخصية مستقلة زي الكبار فلازم تسيبي طفلك يعبر عن نفسه عشان مايضطرش إنه يخرب الحاجات اللي حاوليه عشان ينفس عن اللي جواه.
• إهمال الأهل لتصرفات الأطفال وعدم التوجيه ليهم بيخليم يستمروا في تصرفاتهم ده نوع من التشجيع ليهم بشكل غير مباشر على الغلط.
• وخلي بالك بقى كويس جداً من تصرفاتك أنتي والأب لأن الأطفال عاملين زي الإسفنجة بيمتصوا كل حاجة منكم بسرعة يعني إذا أنتي والأب بتتعاملوا مع بعض بعصبية هيلقت منكوا وهتلاقيه بيتعامل مع الناس اللي حاوليه بعصبية.
• وآخر حاجة نحب نقولهالك إنك لازم تخلي الأطفال تلعب رياضة وتعمل أنشطة عشان تتخلص من العصبية وتخرج الطاقة السلبية وإذا عايزة تعرفي أهمية الرياضة عند الأطفال مكن ترجعي لمقالتنا أهمية الرياضة للأطفال وفوائدها.

وكده نبقي خلصنا مقالتنا واللي اتكلمنا فيها عن مظاهر وأسباب عصبية الاطفال نتمنى إن المقالة تكون عجبتك، وإذا عندك أي أسئلة أو اقتراحات ابعتلنا وفريق عشانك هيرد عليكي في أقرب وقت ممكن.