كيف أكون مستمعة جيدة…مهارة الاستماع

الاتيكيت دايماً بيساعدك إنك تحسني من تصرفاتك وسلوكياتك قدام الناس واللي بتزيد من احترامهم وتقديرهم ليكي ، مهارة الاستماع واحدة من أهم قواعد الاتيكيت اللي ممكن تكتسبيها وتزيد من جمال شخصيتك لكن من الأفضل نقول مهارة الانصات لأن الانصات يعني الاستماع مع التفكير والتركيز في اللي بيتقال.

مهارة الاستماع هي مهارة مكملة لفن الحديث اللي اتكلمنا عنه قبل كده في مقالتنا صوتك وكلامك بيعبرعنك .. إتيكيت الحديث، وبتحتاج منك مجهود كبير عشان تتقنيها وتقدري توظفيها صح عشان كده الاتيكيت حط قواعد نمشي عليها.

قواعد الاتيكيت لتحسين مهارة الاستماع والانصات

– من الضروري جداً إنك تنظرى للي بيكلمك ولكن تكون النظرة علي الوجه كله مش العينين.

– دايماً خلي اللي بيكلمك يحس براحة وإنك عندك استعداد تسمعيه ومتشوقة للي هيتقال ، ما تخليش إحساسك بالملل واللامبالاه يوصل أبداً.

– اتخلصي من أي عناصر تشتيت زي الموبايل مثلاً أو اللعب في أي متعلقات شخصية ، كل الحاجات ديه بتدي رسايل سيئة عنك للي بيتكلم.

– خلي عندك صبر في إنك تسمعي اللي قدامك.

– حافظي علي قد ما تقدري علي حالتك المزاجية.

– لازم تركزي في كلام اللي بيكلمك وتفكري فيه وبناءً علي التفكير ده هيكون عندك أسئلة تقدري تسأليها ، وده هيدل علي إنك مركزة وفاهمة ومستمعة جيدة وهيحس اللي بيكلمك إنه ليه أهمية وإن الكلام معاكي مفيد ، لكن لو بدأتي تفقدي تركيزك ممكن تسألي أسئلة سخفية أو تردي علي أسئلة بإجابات سخيفة أو ملهاش علاقة فهتكون محل سخرية من كل اللي موجودين بس أهم حاجة تسألي من غير ماتقاطعي اللي بيتكلم أبداً لأن ديه عادة سيئة جداً.

– كتير مننا بتتوقع إيه اللي هيتقال وده غلط جداً فده مش شطارة منك ولا ذكاء لأن لا يمكن نعرف اللي قدامنا بيفكر إزاي فلازم نسمع كل اللي بيتقال ، ولو عملتي كده اللي قدامك هيفهم إنه بيتكلم في موضوع مالوش لازمة أو موضوع معروف بالنسبة ليكي فمش محتاجة تسمعي عنه أكتر.

– وإحنا بنسمع بتركيز بيكون تفكيرنا شغال وبنطلع أسئلة لازم نركز أكتر علي اللي بيتقال عشان ممكن تكون الأسئلة اللي عندنا إجابتها اتقالت ، وممكن نعمل حاجات غلط كتير بسبب إن إحنا مركزين بس مع أفكارنا زي مثلا المدير في الشغل بيشرحلك حاجة معينة وفي دماغك بتدور أسئلة كتير فبتكوني مركزة علي الأسئلة والأفكار اللي عندك أكتر من كلام مديرك فهتلاقي في شغلك غلطات كتير بسبب إنك ماسمعتيش بتركيز الكلام اللي اتقال.

– لو بتقابلي ناس جديدة لأول مرة ممكن يكون حد فيهم محرج أو مش عارف يتكلم إنتي ساعديه أو ساعديها بحيث أن اللي قدامك يبقي عنده ثقة وقادر يكمل الكلام ، لكن لو أظهرتي عدم الاهتمام وقعدتي بتلعبي في اي حاجة أو تقعدي مسترخية زيادة عن اللزوم أو سانده دقنك علي يديك فده بيدل علي إنك مستمعة سيئة وكمان هتخلي اللي بيتكلم عنده إحباط وعدم ثقة في نفسه وعدم الراحة والاهتمام.

قواعد الاتيكيت لتحسين مهارة الاستماع أو مهارة الانصات سهلة وبسيطة تقدري تكتسبيها عن طريق الممارسة اليومية ليها وبعد كده هتتعودي عليها وهتلاقيها حاجة حلوة جداً لأن هتفرق في زيادة نسبة استيعابك وتركيزك واهتمامك للشخص اللي بيتكلم مهما كانت أهمية الموضوعات اللي بيتكلم فيها.