كيفية تنظيف الباركيه بطرق بسيطة وسهلة

الأرضيات طبعاً من المكملات الجماليه لديكور أي بيت، عشان كده الناس بتهتم جداً بإختياراتها في الأرضيات سواء كانت سيراميك أو بورسلين أو رخام أو باركيه، ستات كتير بيفكروا إنهم يستخدموا الباركيه في أرضية البيت طبعاً عشان بيدي شكل فخم وجميل للبيت وكمان عشان في الشتا بيخلي البيت دافي على عكس السيراميك والبورسلين، كمان لو عندك أطفال هيحميهم من الإصابات الخطيرة لو حد فيهم وقع على الأرض، بس المشكلة في الباركيه واللي بتخلينا نتردد لما تيجي تشتريه انهم بيكونوا فاكرين تنظيفه صعب ومش عارفين إزاي يعتنوا بالباركيه، عشان كده هنتكلم معاكي عن كيفية تنظيف الباركيه بطرق سهلة وهتخلي أرضيتك نضيفة على طول.

كيفية تنظيف الباركيه:-

• ضروري جداً كل يوم تكنسي الأرض كويس بمقشة بس تبقى ناعمة أو حتى بالمكنسة الكهربائية بس بهدوء عشان ماتخدشيش الأرض.
• بعد ماتكنسي امسحي الأرض بمساحة ناعمة يعني مثلاً المساحة السفنج أو الشرشوبة، وده هيساعدك جدا في التنضيف، بس خلي بالك ماتكحتيش الأرض جامد عشان ماتجرحيهاش.
• لو لاحظتي وجود بقعة صغيرة في الباركيه حطي على البقعة شوية خل وسيبيه شوية وأبدأي امسحي البقعة عادى، الخل من الحاجات المفيدة جداً في التنضيف وكمان هيشيلك الدهون من على الباركيه.
• أما لو البقعة دي كانت صعبة تتشال زي مثلاً بقعة حبر ممكن ساعتها تحطي منظف الباركيه عليها وتدعكيه بليفة خشنة بالراحة عشان ماتجرحيهوش.
• بعد كده امسحي الأرض بالمنظف الخاص بالأرضيات الباركيه ولو لاحظتي إن المايه لسه مانشفتش ضرورى تحاولي إنتي اللي تنشفيها بأنك تمسحيها بقماشة ناشفة وتكون ناعمة في نفس الوقت أو تفتحي الشباك والمروحة، خلي بالك جدا من الخطوة دي عشان المايه لما بتنشف على الباركيه كذا مرة بتتجمع جواه وبتعمل فراغات اللي بتكون سبب رئيسي في ظهور الحشرات وكمان عشان تحافظي عليه لأطول فترة ممكنة.

نصائح للحفاظ على الباركيه لمدة أطول:-

• مهم إنك تحطي سجادة صغيرة على مدخل باب الشقة عشان محدش ينقل تراب من الشارع للبيت، كمان حطي سجادة صغيرة على مدخل كل أوضة عشان تتجنبي انتشار التراب عليه.
• لو عايزة تنقلي أي حاجة من أثاث البيت بلاش تجريها عشان ماتجرحيش الأرضية الأحسن انك تخلي أي حد من أفراد أسرتك يساعدك في شيلها بدل جرها.
• لو عندك أطفال حطي ليهم في أوضتهم سجادة عشان يلعبوا عليها، بدل ما الألعاب بتاعتهم تخدش الباركيه وتبوظه.
• ماتنسيش تمسحي الأرض بسرعة لو أي حاجة وقعت عليها وتنشفيها كويس جداً.

وبكده تبقى عرفتي طرق تنظيف الباركيه والحفاظ عليه لمدة أطول، لو عايزة تعرفي أكتر عن طرق تنظيف الأرضيات شوفي مقالتنا طريقة تنظيف البورسلين.