كيفية التعامل مع الطفل العصبي

فيه أطفال كتير بيبقى عندها سلوك عدواني وعصبي وبتبقى الأمهات مش عارفه تتعامل معاهم إزاي، وكنا قبل كده اتكلمنا معاكي عن المظاهر اللي تقدري تعرفي منها أن طفلك عصبي وكمان قولنالك ايه هي الأسباب الي بتأدي لعصبية الأطفال في مقالتنا مظاهر وأسباب عصبية الاطفال ،في مقالتنا هنقولك على مجموعة من النصائح عشان تعرفي إزاي تتعاملي مع الطفل العصبي.

نصائح للتتعامل مع الطفل العصبي:-

• من أول النصائح اللي نحب إننا نقولك عليها هي إنك لازم تبقى موفرة لطفلك جو هادي وآمن في البيت، ولازم تبقي واخدة بالك كويس من إحتياجات طفلك وتبقي مهتمة بكلامه وطلباته عشان ماتدفعيهوش للعصبية عشان يلفت الإنتباه.
• وطبعاً لازم يبقى عندك توازن في التعامل مع الأطفال يعني خليكي معتدلة ما بين الدلع أو الرفاهية والحزم.
• ومن أفضل الطرق اللي نحب أننا ننصحك بيها عشان تقدري تتعملي مع الطفل العصبي هي إنك لازم تتعاملي معاه بلطف وإحترام قدام الناس عشان ده هيديله إحساس بالأمان وهيخليه يبقى هادي.
• لما الأطفال يطلبوا حاجة منك ماترفضيش أو تقولي لأ على طول حاولي إنك تتكلمي معاهم شويه وتقنعيهم بشكل لطيف بالرفض، عشان إذا إنتي رفضتي بشكل سريع هيبدأ الطفل يتعصب وبعد كده هيبدأ في البكاء والصريخ، لكن لازم يبقى في مسايسة مع الأطفال عشان يسمعوا كلامك.
• لازم تبقي واخدة بالك كويس من إن خلافاتك مع الأب ماتبقاش قدام الأطفال عشان ماتتسببوش في إضطرابات نفسية وعصبية للأطفال.
• لازم طبعاً زي ما قولنا قبل كده إنك تخلي طفلك يعمل أي رياضة أو نشاط حتى إذا جوه البيت عشان يخرج كل الطاقة السلبية وعشان يقلل من سلوكة العصبي أو العدواني.
• لازم طبعاً تخلي بالك من إنك توعدي الأطفال بأن اللي مش هيعمل دوشة أو اللي مش هيعيط ليه مكافأة عشان تشجعيهم على إنهم يحافظوا على الهدوء.
• وإذا كان الأطفال بيلعبوا مع بعض قوليلهم إنكوا إذا لعبتوا مع بعض من غير ما حد يعيط أو يصرخ أو حد يضرب حد هتجبيله هدية وطبعاً لازم توفي بوعدك يعني ماينفعش تقوليلهم كده وخلاص عشان بعد كده مش هيسمعوا الكلام لأنك مش بتكافئيهم.
• ومن أكتر الطرق اللي في أمهات كتير على مستوى العالم بتعملها عشان تخلي الأطفال تبطل عصبية هي التجاهل يعني إنك تسبيه يعيط أو تخليه يدخل أوضة ويفضل فيها لوحده وتتجاهليه تماماً لحد ما يمل وبعد كده هتلاقيه سكت لوحده بس لازم تبعدي خالص عن معاقبته بالضرب لأن ده هيزود من عصبيته.
• دربي طفلك دايماً إنه يعبر عن رأيه عشان ما يحسش بالنقص، وكمان علميه إنه يبقى شخص متسامح مع الناس اللي حاوليه.

وكده نبقى خلصنا معاكي مقالتنا وقولنالك فيها على شوية نصائح عشان تقدري من خلالها تتعاملي مع الطفل العصبي، بنتمنى أن المقالة تكون عجبتك.