كيفية التعامل مع الزوج النكدي

النكد والمشاكل المستمرة من الزوج النكدي مشكلة بتواجه ستات كتير وده طبعاً بيبقى من أكتر الأسباب في الضغط النفسي عليكي خصوصاً إن في غالبية الأحيان ممكن تكوني مش غلطانة الغلط الكبير اللي ماينفعش يعدي عشان الزوج يعمل مشكلة، زي مثلاً إنك تتأخري شويه وأنتي بتجيبي أو بتعملي حاجة هو طالبها.

ديه طبعاً بتبقى لحظات صعبة جداً عليكي خصوصاً إن بيقى عندك مسئوليات كتيرة ضاغطة عليكي وعلى نفسيتك وأعصابك زي مثلاً تربية الأولاد وتنضيف البيت وكمان لو بتشتغلي هبيبقى عندك مشاكل كتيرة وعشان كده بتحاولي على قد ما تقدري تبعدي عن الضغوطات.

بس اللي لازم تفهميه إن في جزء من الرجالة بيبقى شايف إنه ضروري إن يبقى مكشر في البيت عشان مايفقدش مركزه أو هيبته أو إن هو كده شخصيته قوية وبالتالي يفرض إحترامه على مراته وأولاده أو ممكن كمان تبقى ديه طبيعة الزوج.

في كل الأحوال هيبقى الحمل كبير والمسئولية الأكبر عليكي، عشان لازم تتحمليه وتتحملي باقي المسؤليات اللي عليكي.

نصائح للتعامل مع الزوج النكدي:-

• أهم حاجة حاولي إن في معظم الأوقات تخلي في مكان للإبتسامة بينكم وده عن طريق إنك مثلاً تتكلمي في مواضيع مضحكة أو تقولي نكتة.
• ممكن برضه تفتحي معاه كلام عن اهتماماته ووصليله قد إيه إنتي بتحبي هواياته وبتبقى حاجة شيقة بالنسبة لك وإنتي بتشوفيه بيعملها.
• ممكن تفكري في كل أجازة إنكم تبعدوا عن الروتين وتعملوا حاجة جديدة مثلاً إقترحي مكان حلو ومبهج ومفتوح واخرجوا فيه زي مثلاً مول أو ملاهي أو حاجات شبه ديه اللي إنتي وعيلتك بتحبوها.
• إيه رأيك برضه تقعدوا تتفرجوا على فيلم كوميدي أو مسرحية كوميدية عشان تفكوا وتفصلوا من المشاكل والنكد ولو حسيتي إن الزوج مش مهتم ومش عايز يتجاوب معاكي ماتزعيلش ولا تيأسي، استمري على اللي بتعمليه وهتلاقي نفسك إنتي وأولادك قدرتوا تغيروه وبقيتوا أحسن.
• ممكن تقترحي على الزوج تتفرجوا على كارتون مع الأطفال وده لإن في معظم الأحيان الكارتون بتاع الاطفال بيبقى فيه بهجة وبيضحك، أو ممكن تشاركوا الأطفال برضه في الرسم أو التلوين ووصليله إن ده هيبسطك إنتي وهما.
• حاولي يبقى عندكم أصدقاء مشتركين وتروحوا تقعدوا معاهم ده هيخليكوا تحسوا بالتغيير والتجديد وبنسبة كبيرة أوي هتلاقي الملل والنكد بيختفي على الأقل في الوقت اللي إنتوا فيه مع أصحابكم.
• لازم يبقى عندك إهتماماتك الخاصة وماتوقفيش الحياة على الزوج يعني مثلاً إلعبي رياضة أو أخرجي مع أصحابك أو إنزلي إشتري لبس أو إعملي حاجة تحبيها وده عشان تجددي وتبعدي عن ضغط النكد.

في النهاية مهم تعرفي أن أي مشكلة لازم بيبقى ليها حل بس الأهم إنك تلاقي الحل وتقدري تتعاملي معاه لحد ما توصلي لنتيجة ترضيكي وده مش بس في تعاملاتك مع الزوج النكدي ده بشكل عام خليه مبدأ في حياتك.
اعرفي أكتر عن الحياة الزوجية وشوفي مقالتنا أسرار التواصل الناجح بين الزوجين.