كيفية اختيار هدايا مناسبة

الهدايا من أكتر الحاجات اللي ممكن تبسط ، بس المشكلة اللي بتقابلك دايماً لما بتكوني عايزة تجيبي هدية لحد إنك بتكوني محتارة جداً ومش عارفة تختاري إيه خصوصاً إن الهدايا بتسيب أثر عند اللي بتقدميها ليه وكمان بتعتبر من فنون الإتيكيت المهمة ، عشان كده جبنالك شوية نصائح هتساعدك في اختيار هدايا مناسبة.

كيفية اختيار هدايا مناسبة:-

• أول حاجة لازم تاخدي بالك منها وأنتي بتختاري هدية لأي حد سواء بقى حد من أقاربك أو إخواتك أو أصحابك إنك تراعي اهتمامات الشخص ده وهواياته وسنه عشان الهدية تبقى مناسبة ليه.
• لو كنتي عايزة تجيبي هدية لحد من زمايلك بلاش هدايا يكون فيها اختلاف في الأذواق ، يعني بلاش الهدايا تكون هدوم أو برفانات أو ماكياج عشان كل واحد ذوقه بيختلف فيها من واحد للتاني.
• خلي بالك لو كانت الهدية لرئيسك في الشغل الأحسن إنها تكون حاجة رمزية بس في نفس الوقت قيمة فممكن تجيبي أدوات مكتبية زي قلم مثلاً يكون شكله شيك.
• لو كنتي عايزة تجيبي هدية لحد إتجوز قريب وأنتم مش أصحاب أوي ممكن تجيبي ورد مثلاً كنوع من المجاملة البسيطة للجواز بس خلي بالك وأنتي بتختاري الورد إن ألوانه تكون جميلة ومتناسقة ، لكن لو حد من أصحابك أو إخواتك أو أقاربك فأكيد هتبقي عارفة إيه الحاجات اللي نقصاهم.
• اختاري حاجة منهم على حسب ميزانيتك وقدميها.
• طبعاً لازم تاخدي بالك كويس جداً من التوقيت اللي هتقدمي فيه الهدايا ، عشان ممكن تكوني مثلاً جايبة هدية لصحبتك وهي في التوقيت ده عندها مشكلة مالية فتفتكر أنك جايبة الهدية ديه كنوع من أنواع المساعدة “الشفقة” عليها وأنتي ماتقصديش ، عشان كده لازم تخلي بالك.
• كمان في حاجة لازم تبقي عارفاها ، إنه ماينفعش أبداً تقدمي لحد هدية تكون جتلك من حد تاني.
• مهم برضه تختاري تغلفي الهدية بشكل كويس أو شنطة الهدايا اللي هتختاريها تكون مناسبة وقيمة، ممكن برضوا تكتبي كارت صغير تحطيه مع الهدية.
• أهم حاجة أوعي تنسي تشيلي السعر من على الـهدية لأن ده بيكون موقف وحش جداً ممكن تتفهمي بيه بطريقة مش حلوة.
• أوعي تنسي وأنتي بتقدمي الهدايا أن يكون مزاجك كويس وتبقي بتضحكي عشان مايبانش أنك متضايقة من صاحب الـهدية اللي أنتي بتقدميها ليه ويتاخد عنك انطباع مش حلو فلو كنتي تعبانة اليوم ده او متضايقة من حاجة الأحسن إنك تأجلي موضوع الهدية ليوم تاني.

وفي النهاية مهم تعرفي وتتأكدي إن الهدية مش لازم تكون غالية عشان تقدري تعبري بيها عن فرحتك بأي مناسبة هتقدميها فيها المهم الذوق وإنك إزاي تقدميها للشخص اللي قدامك.