فوائد زيت الزيتون للشعر

صحة شعرك وجماله أكتر حاجة مهمة بالنسبالك عشان معروف إن الشعر تاج على راس كل ست في الدنيا، مش بس كده ده كمان بيعتبر المرايا اللي بتعكس جمالك قدام أي حد يشوفها، عشان كده دايما بتدوري على وصفات طبيعية تفيدك في علاج مشاكل الشعر وكمان عشان تحافظي على صحة شعرك ونعومته ولمعانه وطبعا لما هنتكلم عن الوصفات الطبيعية يبقى لازم نتكلم عن زيت الزيتون للشعر وده عشان زيت الزيتون فوايده كبيرة وعظيمة لصحة شعرنا لما نقولك عليها عمرك ماهتترددي أبدا تستخدميه في العناية بشعرك.

منع هيشان الشعر:

زيت الزيتون للشعر مفيد جدا عشان يهدي من هيشان شعرك، كل اللي هتحتاجيه إنك تدهني على شعرك كمية مناسبة من زيت الزيتون (على حسب طول وكثافة شعرك) إدهنيه بعد ماتستحمى وسرحي شعرك بمشط واسع عشان تقدري تفكي الخصلات المتشابكة وهتلاحظي إن هيشان شعرك اهدى بكتير من الاول.

علاج جفاف الشعر:

زيت الزيتون ليه قدرة كبيرة جدا في علاج الشعر الجاف والتالف وده عشان بيغذيه بالفيتامينات اللي بيحتاجها عشان يرجع صحي تاني.

لو كنتي بتعاني من جفاف الشعر، دلكي شعرك من جذوره لأطرافه بزيت الزيتون مرتين في الاسبوع وبشكل منتظم وهتلاحظي بنفسك الفرق في شكل شعرك وملمسه بعد وقت قصير جدا.

بلسم طبيعي للشعر:

لو بتدوري على بلسم مناسب لنوع شعرك، إستخدمي كمية مناسبة من زيت الزيتون على شعرك وإنتي بتستحمي بدل البلسم وبعدين إغسليه كويس جدا، ده بيكون بديل للبلسم وكمان أمان لصحة شعرك.

تطويل الشعر:

زيت الزيتون من الخلطات الطبيعية اللي بتساعد بشكل كبير على زيادة طول شعرك، دلكي فروة راسك بـ زيت الزيتون مرتين في الإسبوع وهتلاحظي بعد فترة إن شعرك بيطول بشكل سريع وصحي.

(اعرفي أكتر عن كيفية تطويل الشعر بـ زيت الزيتون).

تنعيم الشعر:

الشعر الخشن والمجعد مشكلة بتدايق ستات كتير، بس زيت الزيتون بيقدر يحل المشكلة دي.

هتحتاجي إنك تدلكي شعرك من جذوره لأطرافه بكمية مناسبة من زيت الزيتون الدافي (حطي الزيت في طبق ينفع يتسخن على النار ودفي الزيت بحيث تقدري تستحملي سخونته) سبيه على شعرك نص ساعة وبعدين إغسليه بشامبو مناسب لنوع شعرك.

إستعمليه مرة في الإسبوع وهتلاحظي فرق كبير في نعومة شعرك.

التخلص من قشرة الشعر:

لو بتعاني من قشرة الشعر وعايزة حل مناسب للمشكلة دي، إخلطي كميات متساوية من زيت الزيتون وعصير اللمون والمية مع بعض(معلقتين من كل حاجة أو أكتر حسب إحتياجك، بس أهم حاجة الكمية تبقى واحدة) ودلكي فروة راسك بيهم وسبيه تلت ساعة وبعدين أغسليه.

اللمون حمضي فهيساعدك في التخلص من قشرة الشعر بس المشكلة انه هيخلي فروة الراس جافة وده دور زيت الزيتون اللي هيرطبها بشكل كبير ويحافظ على نعومة شعرك.

عشان كده الطريقة دي علاج ممتاز لقشرة الشعر، إستخدميها مرة واحدة بس كل إسبوعين والقشرة هتختفي نهائي.

بالشكل ده تكوني عرفتي فوايد زيت الزيتون لشعرك، بنتمنى إنك تستخدميه عشان تحافظي على جمال شعرك ونعومته.