علاج الشعر المتقصف للعروسة بوصفات طبيعية

بنات كتير بتعاني من مشكلة الشعر المتقصف وطبعاً لو فيه عروسة وفرحها قرب بتبقى دايماً عايزة تعرف ايه هي طرق علاج الشعر المتقصف من خلال الوصفات أو الماسكات المناسبة لشعرها، وطبعاً بتدور على وصفات تكون طبيعية عشان تقدر من خلالها إنها تتخلص من تقصف الشعر.

عشان كده هنقولك في مقالتنا على وصفات للشعر المتقصف بمكونات طبيعية وآمنة على شعرك وكمان هتبقى وصفات سهلة هتقدري تعمليها في البيت، اخترنالك شوية وصفات طبيعية إختاري منها الأنسب لنوع شعرك.

وصفة الأفوكادو والزيوت الطبيعية للشعر المقصف:-   

• من وصفات الشعر الطبيعية المفيدة للشعر المتقصف هي الأفوكادو مع زيت الزيتون وطريقة استخدامه بتبقى عبارة عن معلقتين كبار زيت زيتون ومعاهم معلقتين كبار زيت جوز الهند (ويفضل إنك تدفي الزيوت شوية قبل ما تحطيها على شعرك عشان تديكي نتيجة أحسن).
• وبعد كده هتجيبي الزيوت وهتحطي عليهم الأفوكادو بعد ما تهرسيه وهتقلبيهم مع بعض كويس لحد ما يبقى الخليط كريمي.
• وبعد كده هتحطي الخليط على شعرك ومش لازم تحطي من الخلطة على جذور وفروة الشعر بس حاولي إنك تركزي أكتر على أطراف الشعر.
• وبعدين هتربطي شعرك على شكل ديل حصان، بعد كده هتغطيه بورق بلاستيك استرتش أو فوطة وهتسبيهم على شعرك لمدة 30 دقيقة أو أكتر عشان توصلي لنتيجة أحسن.
• آخر حاجة اغسلي شعرك وبعد كده هتحطي بلسم عشان تحسي باللمعان والنعومة في شعرك.

خلطة البلسم مع الزيوت الطبيعية:-

• اخلطي معلقتين كبار من بلسم الشعر وطبعاً اختاري البلسم المناسب لنوع شعرك ومعاه معلقتين كبار زيت زيتون أو زيت جوز الهند.
• وبعد كده حطي الخليط ده على أطراف شعرك المقصفة وحاولي إنك تركزي عليها كويس وبعد كده هتسبيها على شعرك لمدة نص ساعة وبعدها إغسلي شعرك كويس بالمايه والشامبو.

خلطة صفار البيض مع زيت الزيتون:-

• عشان تحضري ماسك لشعرك من صفار البيض وزيت الزيتون هتجيبي 3 معالق كبار زيت زيتون ومعاهم معلقة كبيرة عسل وتخلطيهم مع صفار بيضة.
• وبعد كده هتحطي الخليط ده على أطراف شعرك وهتسبيه لمدة ساعة.
• اشطفي شعرك كويس وهتحطي البلسم على أطراف شعرك وهتكرري الطريقة ديه على الأقل مرة واحدة كل إسبوع.

ماسك الموز وزيت اللوز:-

• ماسك الموز مع زيت اللوز من الوصفات المفيدة جداً في علاج الشعر المتقصف وبتقلل من جفاف الشعر وبتساعد على تقوية وترطيب الشعر وبتبقى عبارة عن موز مهروس ومعاه زيت اللوز وبنخلطهم مع بعض كويس وبندلك بيه الشعر كله من الجذور للأطراف وسيبه على شعرك لمدة 30 دقيقة وبعد كده اغسلي شعرك كويس.

وكده نبقى خلصنا معاكي مقالتنا عن علاج الشعر المتقصف للعروسة بوصفات طبيعية، ولو عندك أي أسئلة أو اقتراحات ابعتلنا وفريق عشانك هيرد عليكي في أقرب وقت ممكن.