طريقة عمل كوسة بالبشاميل

الكوسة من الأكلات المفيدة جداً عشان مليانة بالفيتامينات والماغنسيوم والحديد والكالسيوم المهمين جداً للعضم والأسنان وتحسين جهاز المناعة كمان بتساعد بشكل كبير على تقليل نسبة الكوليسترول في الدم وبتهدي الاعصاب بنسبة كبيرة فبتساعد على النوم بشكل أحسن، مش بس كده ديه كمان بتساعد على التركيز بشكل أحسن وبتقوي الذاكرة، بس للأسف بالرغم من فوايد الكوسة الكتيرة، في ناس كتير مش بتحب تاكلها وخصوصاً الأطفال، عشان صحتك وصحة أولادك مهمة بالنسبة لينا إيه رأيك تغيري من الطريقة التقليدية في عمل الكوسة وتعمليها بطريقة جديدة تخليهم يحبوها ويطلبوها منك؟ تعالي نعمل كوسة بالبشاميل هتحبيها وأولادك هيحبوها جداً.

المقادير:

• كيلو كوسة.
• نص كيلو لحمة مفرومة.
• بصلتين حجمهم متوسط (يعني مش صغيرين ومش كبار أوي).
• 3 معالق كبار دقيق .
• 3 معالق كبار زبدة.
• لتر لبن.
• نص كوباية جبنة موتزريلا.
• ربع كوباية جبنة رومي مبشورة.
• بيضة.
• معلقة ملح صغيرة.
• معلقة فلفل أسود صغيرة.
• مكعب مرقة دجاج.
• 3 معالق زيت (أي نوع زيت بتطبخي بيه).
• معلقتين صلصة طماطم.

خطوات عمل كوسة بالبشاميل:

• الأول هتعصجي اللحمة بالطريقة التقليدية اللي متعودين عليها وهي إنك هتجيبي طاسة كبيرة أو حلة، هتحطي الزيت في الطاسة وتحمري فيه البصل، بعدين تحطي اللحمة وتقلبي كويس، بعد كده حطي ملح وفلفل والبهارات اللي بتحبيها زي مثلاً “القرفة والزنجبيل والحبهان والروزماري وجوزة الطيب” ومعلقة صلصة وقلبي اللحمة كويس جداً 5 دقايق وزودي مايه وسيبيها تستوي على راحتها على نار هادية بس كل شوية قلبيها.
• على ما اللحمة تستوي قشري الكوسة وقطعيها دواير، بعدين هاتي حلة فيها مايه وحطي فيها الكوسة وملح وفلفل وسيبيها تتسلق ربع ساعة (بحيث تكون نص سوى).

طريقة تحضير البشاميل:

• هاتي حلة وحطي فيها شوية زيت ومعلقتين كبار سمنة.
• وضيفي كوباية الدقيق وقلبي كويس وبسرعة بالمضرب السلك وضيفي اللبن شوية شوية وافضلي قلبيه بالمضرب لحد مايتخلط كويس.
• دوبي المرقة في ربع كوباية مايه سخنة وضيفيها عليهم.
• بعدين هتحطي البيضة والملح والفلفل وتفضلي تقلبي كويس جداً لحد ماتوصلي للقوام اللي إنتي عايزاه (لو لقتيها خفيفة ضيفي معلقتين دقيق ولو تقيلة زودي لبن).

ودلوقتي هتجيبي صينية وابدأي رصي الكوسة، هتحطي طبقة بشاميل وبعديها الكوسة وبعديها اللحمة وتفضلي ترصي كده بالترتيب لحد ماالصينية تتملي.

على الوش هتحطي الجبنة الرومي والجبنة الموتزاريلا وتدخليها الفرن من تلت ساعة لنص ساعة لحد ما يبقي لونها دهبي.

بعدين طلعيها وسيبيها تبرد شوية وقطعيها ورصيها في أطباق التقديم بالشكل ده.

وبكده تبقي عملتي أحلي كوسة بالبشاميل تقدميها لأولادك بطريقة جديدة هيحبوها وتشجعهم إنهم ياكلوها ويطلبوها منك دايماً.