المطبخ الهندي
طريقة عمل فراخ ماسالا على الطريقة الهندية
هنتكلم عن وصفة جديدة من المطبخ الهندي وهي(فراخ ماسالا) وديه بتبقى عبارة عن صدور فراخ بالبهارات والكاري، طعمها مميز جداً وكمان هتعجبك وهتعجب أسرتك ولو كنتي أول مرة تسمعي كلمة ماسالا أو مستغرباها خليني أقولك في الأول إن معنى ماسالا يعني خليط التوابل أو خليط البهارات.
المطبخ الهندي أو الأكلات الهندية معروف عنها إنها بتعتمد بشكل أساسي على البهارات الكتيرة والأكل بيبقى حراق جداً، لكن الوصفة اللي هنقولك عليها ديه مش حراقة أوي وممكن كمان تستغني عن الشطة فيها لو مش عايزاها.
وصفة فراخ ماسالا بتنقسم لنصين (الفراخ والصوص).
مقادير الفراخ:
- نص كيلو صدور فراخ متقطعة مكعبات.
- كوباية زبادي.
- معلقة عصير ليمون كبيرة.
- معلقتين كمون صغيرين.
- معلقة قرفة صغيرة.
- نص معلقة فلفل أسود صغيرة.
- معلقتين صغيرين شطة( اختياري).
- معلقة كبيرة زنجبيل مبشور.
- نص معلقة ملح صغيرة.
- معلقتين كبار زيت.
مكونات الصوص:
- معلقة زبدة كبيرة.
- 3 فصوص توم مفرومين.
- بصلة صغيرة.
- معلقتين صغيرين بابريكا.
- معلقتين ونص صغيرين كاري.
- معلقتين صغيرين كمون.
- ربع معلقة ملح صغيرة.
- معلقتين كبار صلصة.
- كزبرة خضرا.
- كوبايه مايه.
- كوباية كريمة طبخ.
بعد ماجهزنا كل المكونات تعالي نعمل بقا فراخ ماسالا على الطريقة الهندية:-
طريقة التحضير:
- الأول هتنقعي الفراخ في الزبادي والبهارات اللي قولنا عليها كلها فوق والليمون لمدة ساعة، طبعاً كل ما المده زادت هتبقى احسن.
- بعدين هتشيلي الفراخ من التتبيلة، بس خلي بالك متصفيهاش أوي.
- حطي الزيت في طاسة كبيرة وشوحي فيها الفراخ، بعدين طلعيها وشيليها في طبق على جنب.
لتحضير الصوص:-
- في نفس الطاسة اللي حمرتي فيها الفراخ هتحطي الزبدة وتحمري فيها البصلة والتوم المفروم.
- حطي الكاري والملح والبابريكا والكمون وقلبيهم كويس.
- في طبق صغير هتخلطي الصلصة مع المايه وتضيفيهم في الطاسة.
- حطي الكريمة كمان فوقيهم واستني لما الصوص يغلي وبعدين ضيفي الفراخ اللي حضرناها قبل كده.
- سيبي الطبخة خمس دقايق على نار هادية لحد ماتتسبك.
كده تبقي عملتي أحلى فراخ ماسالا على الطريقة الهندية، حطيها بقي في طبق التقديم مع الرز وزينيها من فوق بالكزبرة.
Loading ...
