طريقة عمل شوربة العدس الهندية

شوربة العدس من أكتر أنواع الشوربات شهرة في الشرق الأوسط وخاصةً في الهند وطبعاً السبب في كده إن شوربة العدس مفيدة جداً وكمان بتتميز بمذاق شهي لما بتتعمل بالطريقة الهندية الحارة ، عشان كده هنقولك على طريقة عمل شوربة العدس الهندية بطريقة سهلة وبسيطة وإزاي ممكن تعمليها لأسرتك بدون مجهود وفي وقت قليل.

مقادير شوربة العدس الهندية:

• كوباية عدس أصفر مطحون.
• معلقة سمن كبيرة.
• معلقة كبيرة من أي زيت نباتي.
• معلقة صغيرة كمون بس يبقى مش مطحون (بذور).
• معلقة صغيرة كزبرة برضه تبقى مش مطحونة (بذور).
• معلقة كبيرة زنجبيل طازة ومش مبشور.
• نص كوباية بصل مقطع ناعم.
• معلقة كبيرة ثوم مدقوق.
• معلقتين صغيرين من بودرة الشطة (هتلاقيها عند العطار).
• كوباية كزبرة خضراء وتكون متقطعة.
• معلقة كبيرة من الفلفل الأحمر الحار المتقطع قطع صغيرة أوفلفل أخضر مقطع لشرايح .
• معلقة صغيرة من بهارات مسالا الهندية (اسألي عليها العطار).
• معلقة صغيرة كركم.
• ملح على حسب ما تحبي.
• عصير ليمون (ده اختياري يعني لو حابة تحطيه ماشي مش عايزة مفيهاش مشكلة).

طريقة عمل شوربة العدس الهندية:

• إغسلي العدس كويس جداً بالمايه وبعدين هاتي حلة صغيرة وإغلي فيها مايه وبعد ما تتغلي حطي فيها العدس بس خليه على نار عالية لحد ما تلاقي أي شوائب بقت على سطح المايه.
• بعد كده ابدأي وطي عليه عشان يدخل في الِسوا ولما تلاقيه خلص تسويته شيليه من على النار وصفيه وتبليه بالملح والفلفل وعصير الليمون.
• سخني السمنة وحمصي فيها بذور الكمون والكزبرة لمدة ثواني وبعد كده ضيفي البصل والثوم والزنجبيل وبهارات جارام مسالا الهندية وقلبي كل ده مع بعض بهدوء.
• بعد كده حطي العدس في طبق التقديم وعليه التوابل اللي حمرتيها.
• بالنسبة بقى للتزيين فهتجيبي البصل المتقطع لشرايح وهتحمريه في خليط الزيت والسمنة لحد لونه ما يبقى دهبي وشيليه حطيه على مناديل عشان ينزل الزيت والسمن.
• بعد كده حطيه على العدس وممكن كمان تحطي على الوش من فوق كزبرة لو تحبي.
• ممكن كمان تقدمي مع شوربة العدس العيش المحمص اللي هنقولك إزاي تعمليه دلوقتي.

مكونات العيش المحمص:

• عيش فرنساوي.
• نص كوباية جبنة موتزاريلا.
• كوباية جبنة بارميزان.
• فصين ثوم.
• معلقتين زبدة.

طريقة التحضير:

• افرمي الثوم وبعدين حطيه على الزبدة وقلبيهم كويس جداً مع بعض ودخليهم في الميكروويف لمدة ثواني عشان الزبدة تسيح وتاخد من نكهة الثوم.
• قطعي العيش بالحجم اللي تحبيه بس ياريت يبقى رفيع وبعدين ادهنيه بخليط الثوم اللي بالزبدة وحطي من فوق الجبنة البارميزان والموتزاريلا.
• دخليهم الفرن لمدة 20 دقيقة لحد ما ياخد اللون الدهبي وبعد ما تخرجيه من الفرن سبيه دقايق يبرد شوية وبعدين قطعيه مكعبات وحطيه في شوربة العدس أو ممكن تقدميه لوحده شرايح.

وبكده نبقي قولنالك على أبسط وأشهى وصفة من المطبخ الهندي وهي طريقة عمل شوربة العدس الهندية ، نتمنى تعجبك إنتي وأسرتك وبألف هنا وشفا.