طريقة عمل البيكاتا بالمشروم

من الأطباق الإيطالية التقليدية، والطبق ده منتشر في كل أنحاء العالم علي قوائم الطعام ، وكمان من الأطباق السهلة والبسيطة اللي تقدري تغيري بيها طريقة الأكل علي سفرتك عشان ولادك يحبوا الأكل أكتر وما يتعبوكيش ، انهارده هنقدمكلك طريقة عمل البيكاتا بالمشروم بوصفتين مختلفتين ، بيكاتا اللحم بالمشروم ، وبيكاتا الفراخ بالمشروم:-

طريقة عمل بيكاتا اللحم بالمشروم:-

مقادير بيكاتا اللحم:-

1- 8 شرايح لحمة بتلو.
2- ربع معلقة صغيرة ملح.
3- ربع معلقة صغيرة فلفل أسود.
4- فصصين توم مفرومين.
5- ربع كوباية مشروم متقطع.
6- نص كوباية دقيق.
7- 3 معالق كبار زبدة.
8- زيت زيتون أو زيت نباتي.
9- معلقتين كبار عصير ليمون.
10- نص كوباية شوربة لحمة.
11- ربع كباية بقدونس مفروم ناعم.

طريقة تحضير بيكاتا اللحم:-

– أول حاجة بتجيبي شرايح اللحمة وتحطيها بين ورقتين زبدة أو كيسين بلاسيتيك وترققيها بالشاكوش الخشب بتاع اللحمة أو ممكن بالنشابة لو مش متوافر عندك الشاكوش.

– بعد كده تبلي شرايح اللحمة من الناحيتين بالملح والفلفل الأسود وبعد كده حطيها في الدقيق ، بعدها سخني طاسة وحطي فيها زيت الزيتون أو زيت نباتي حسب المتوافر عندك وممكن كمان تضيفي مع الزيت معلقة زبدة ، واقلي شرايح اللحمة في الزيت لغاية ما تتحمر من الناحيتين كويس ، وبعد ما تتحمر حطيها في طبق علي جنب.

– هاتي طاسة تانية وحطي زيت زيتون أو زيت نباتي وبعد ما يسخنوا ضيفي التوم المفروم والمشروم وحمريه لغاية ما يبقي لونه دهبي ، وبعدها برضه حطيهم في طبق علي جنب لغاية ما نجهز صوص بيكاتا اللحم ، وممكن كما تحمري التوم والمشروم في نفس الطاسة بتاعت اللحمة ، وده هيخلي النكهة معاكي أغني ، بس لو الزيت اتحرق منك وأنتي بتحمري اللحمة يبقي من الأفضل تحمري التوم والمشروم في طاسة تانية.

لتحضير صوص بيكاتا اللحم بالمشروم:

حطي الزبدة في طاسة وسبيها لحد ما تسيح علي النار وحطي حبة زيت صغيرين ، بعد كده حطي نص كوباية الدقيق وافضلي قلبي لغاية ما يبقي لونه دهبي بس خلي بالك ما يبقاش لونه بني عشان كده هيكون اتحرق وهيبقي طعمه مش حلو ، أول لما يبقي لونه دهبي ضيفي شوربة اللحمة وافضلي قلبي لغاية ما يتكون عندك صوص متجانس.

– بعد كده ضيفي التوم والمشروم علي الصوص وقلبي كويس لمدة دقيقة وبعد كده ارفعيها من علي النار وضيفي آخر مكون عصير الليمون ، وبعد كده حطي شرايح اللحمة في طبق التقديم وصبي عليها الصوص وزينيها بالبقدونس المفروم.

– ممكن كمان تحطي شرايح اللحمة علي الصوص قبل ما تطفي عليها وقلبي اللحمة مع الصوص لمدة دقيقة وبعد كده ارفعيها من علي النار وضيفي عصير الليمون ، وآخر حاجة حطيها في طبق التقديم وزينيها بالبقدونس المفروم.

ممكن تقدميها مع الرز الأبيض أوالرز بالشعرية والخضار السوتيه أو البطاطس المحمرة.
ولسه وصفاتنا من البيكاتا ما خلصتش شوفي وصفتنا طريقة عمل بيكاتا الفراخ بالمشروم.