طريقة عمل البيتزا السريعة في الطاسة

في مقالتنا هنقولك على طريقة عمل البيتزا السريعة بوصفة سهلة من المطبخ الإيطالي المميز وديه طريقة تقدري تعمليها من غير متاخد منك وقت وتقدري تعمليها واجبة فطار لأولادك الصبح وهما رايحين المدرسة ، تعالي نعرف مع بعض من خلال المقالة بتاعتنا الطريقة والمكونات بتاعت البيتزا السريعة في الطاسة.

المقادير لعجينة البيتزا السريعة:-

• كوباية دقيق.
• رشة ملح.
• 1/2 معلقة صغيرة سكر.
• معلقة صغيرة بيكنج بودر.
• معلقة صغيرة خميرة فورية.
• معلقتين كبار زيت زيتون.
• 1/4 كوباية مايه أو لبن رايب أو زبادي للعجن.

لحشو عجينة البيتزا السريعة:-

• صلصة طماطم.
• فلفل رومي أخضر أو ممكن فلفل ألوان.
• بصلة مبشورة.
• زيتون مخلي حسب الكمية اللي إنتي عايزاها.
• ممكن تحطي (لحمة مفرومة أو بسطرمة أو سوسيس أو سلامي أو تونة أو فراخ مقطعة مربعات صغيرة) حطي أي حاجة حسب ما تحبي.
• 1/2 كوباية جبنة موزاريلا أو شيدر أو رومي حسب رغبتك.

لصلصة البيتزا:-

• ملح وفلفل.
• ريحان وسماق (نوع من التوابل اسألي عليه عند العطار).

طريقة تحضير البيتزا السريعة:- 

طبعاً أول حاجة هنعملها في طريقة عمل البيتزا هي إنك هتدوبي الخميرة في شوية مايه دافية وسبيها عشر دقايق وبعدين إعجني الدقيق مع البيكنج بودر وحطي عليهم الخميرة وحطي الزيت وزودي المايه أو اللبن أو الزبادي على حسب ما العجينة تحتاج واعجنيهم مع بعض لحد ما تمسك كويس في بعضها.

سبيها تخمر في مكان دافي وبعدين جهزي الصلصة وباقي مكونات الحشو وهاتي طاسة تيفال أو سيراميك وادهينها زيت وافردي عليها العجينة بتاعت البيتزا اللي عملناها وبعدين حطي صلصة الطماطم على العجينة.

وحطي بعد كده الفلفل الألوان والبصلة المبشورة و بعدين حطي اللحمة أو البسطرمة أو التونة أو الفراخ حسب ما أنتي عايزة.

وبعدين حطي الطاسة على نار هادية جداً وغطيها وسبيها تستوي وبعد لما تستوي وزعي الجبنة عليها من فوق الوش وسبيها شوية وبعدين دخليها المايكروويف عشان الجبنة تسيح كويس.

خرجيها من الميكروويف وقدميها وهي سخنة وكده تبقي عرفتي طريقة عمل البيتزا السريعة وممكن تقدميها مع سلطة الذرة بالمايونيز، تعالي معانا نقولك على طريقتها.

مقادير السلطة:-

• علبتين ذرة مغسول ومتصفي.
• معلقة كبيرة زيت زتون.
• معلقة كبيرة فلفل إسود.
• 1/2 معلقة صغيرة ملح.
• 1/2 كوباية مايونيز.
• مقدار كوباية فلفل ألوان مقطع مكعبات.

طريقة تحضير سلطة الذرة:-

أول حاجة هنعملها هي إننا هنخلط زيت الزيتون ونحط معاه الملح والفلفل الأسود وبعدين المايونيز والفلفل الألوان وهنسيبهم في التلاجة لمدة ساعة.

وتاني خطوة هنحط الذرة على التتبيلة بتاعتنا ونقلبهم كويس مع بعض كلهم وبعدين نحطها في أطباق التقديم وممكن تروشي شوية بقدونس فريش من فوق الوش للتزيين.

سلطة الذرة

وديه كانت وصفتنا طريقة سهلة وبسيطة لعمل البيتزا السريعة على طريقة المطبخ الايطالي المميز بين كل مطابخ العالم في كل أنواع البيتزا وإذا عايزة تعرفي أنواع أكتر من البيتزا السريعة الايطالية ممكن ترجعي لمقالتنا طريقة عمل البيتزا الايطالية الكواترو تشيز.