طريقة التخلص من بقع الشوكولاته

مفيش شك طبعاً إن الشوكلاته بيحبها كل كبير وصغير عشان هي من أحلى وألذ الأكلات، بس أكل الشوكلاته ممكن يعمل مشكلة كبيرة خصوصاً في فصل الصيف عشان بتلاقيها بتسيح بسرعة جداً فممكن تقع على الهدوم أو السجاد أو الصالون من غير ما ناخد بالنا فتسبب مشكلة كبيرة لأن طريقة التخلص من بقع الشكولاته مش سهلة أبداً، أو لو عندك أطفال سهل جداً يبقعوا هدومهم بالشوكولاته أو يوقعوها على أي حاجة.

بقعة الشوكولاته من البقع الصعبة والعنيدة خصوصاً لو ماخدتيش بالك منها ونشفت على الهدوم أو السجاد، عشان كده دايماً بتدوري وتفكري في حلول مختلفة عشان تقدري تتخلصي من بقعة الشوكولاته المزعجة.

وعشان راحتك حاجة مهمة بالنسبة لينا حبينا نقولك على طرق تساعدك في التخلص من بقعة الشوكولاته مش بس على الهدوم لأ ده كمان على السجاد والأنتريه أو الصالون.

طريقة التخلص من بقع الشوكولاته من الملابس:

• لو بقعة الشوكولاته ديه لسه جديدة حطي عليها على طول أي نوع صابون سائل (اللي بتغسلي بيه المواعين) وأدعكيها كويس أوي وبعدين إنقعيها ربع ساعة في مايه دافية وإغسلي الهدوم ديه عادي جداً في الغسالة هتلاقي البقعة راحت.
• أما لو البقعة نشفت على الهدوم وماقدرتيش تعملي الخطوة اللي فاتت، حطي الهدوم اللي عليها البقعة دي في التلاجة لحد ما الشوكولاته اللي عليها تجمد، بعدين طلعيها وأفضلي أدعكيها على قد ماتقدري، بعد كده حطي صابون سائل على ظهر البقعة ديه وصبي عليها ميه سخنة وأفضلي ادعكيها كويس لحد ماالبقعة تختفي وبعد كده أشطفيها، لو بقعة الشوكولاته لقيتيها لسه ماتشالتش وصعبة ممكن تعملي الخطوة ديه تاني بس تزودي على الصابون السائل شويه جلسرين سائل (هاتيه من أي صيدلية).
• لو لسه البقعة سايبة أثر هاتي من عند العطار زيت برتقال وحطي على البقعة كام نقطة منه “من غير ماتخففيه” وبعدين ادعكي الهدوم كويس وحطيها في الغسالة.

طريقة التخلص من بقع الشوكولاته من على السجاد:

• استني لحد ما بقعة الشوكولاته تنشف وبعدين أدعكيها كويس بفرشة السجاد على قد ماتقدري، بعدين حطي على البقعة شوية من صابون التنضيف الخاص بالسجاد او أي صابون سائل (لو مش عندك صابون السجاد ممكن تخلطي معلقة نشادر مع كوباية مايه) حطيهم على البقعة وافضلي إدعكيها كويس بفرشة السجاد، بعد كده هاتي قماشة نضيفة وإبدأي امسحي الصابون مكان البقعة من السجادة وسيبيها لحد ماتنشف.

طريقة التخلص من بقع الشوكولاته من الأنتريه أو الصالون:

• سيبي البقعة لحد ماتنشف خالص، ممكن تشغلى المروحة قدام البقعة عشان تسرعي الموضوع شوية.
• هاتي فرشاة السجاد أو سكينة مش حامية عشان ماتقطعيش الفرش وادعكي الشوكولاته من الفرش عشان تتشال (المقصود من الحركة دي انك تشيلي الشوكلاته الزيادة من الفرش عشان تبقى سهلة عليكي في تنضيفها، لو خايفة من حركة السكينة استخدمي أحسن فرشاة السجاد عشان بتكون خشنة شوية).
• افردي فوطة على مكان البقعة وإمشي عليها مرة أو مرتين بالمكواه، بس خلي بالك مهم تكون حرارتها متوسطة يعني بلاش تكون الحرارة عاليه عشان الشوكولاته ماتسيحش وتبقى البقعة أصعب.
• حطي بقى صابون سائل على البقعة أو أي نوع مزيل بقع وأفركيها كويس بالفرشاة، بعدين أمسحيها بقماشة نضيفة وسيبيها تنشف.

وبكده بقعة الشوكولاته مش هتبقى صعبهة عليكي بعد كده أيا كانت البقعة ديه في الهدوم أو السجاد أو الأنتريه عشان هتقدري تتعاملي معاها بسهولة مع الطرق اللي قولنالك عليها.