طرق ازالة بقع الحبر من الملابس

بقع الحبر من أكتر أنواع البقع اللي منتشرة بين الناس ودايماً ستات البيت بيشتكو منها عشان بقع الحبر من أصعب أنواع البقع ومش بتتشال بسهولة وده بيخلينا نكون مضطرين نستغنى عن كتير من هدومنا، عشان مهما اتغسلت الهدوم ديه بقعة الحبر مش بتتشال منها، هي بس لونها بيفتح لكن مش بتتشال بشكل نهائي، عشان كده هنقولك في مقالتنا على طرق ازالة بقع الحبر من الملابس سواء كان حبر سائل أو جاف بكل سهولة

طريقة ازالة بقع الحبر من الملابس (الحبر السائل):-

• هتجيبي المكان اللي فيه بقعة الحبر وتحطي تحتيها قماشة تخينة شوية عشان البقعة متتنقلش للناحية التانية من الهدوم أو تنتشر في مكان تاني، بعدين حطي عليها أي مسحوق غسيل بتستخدميه وسيبيه دقيقتين عليها بعد كده رشي عليها شوية مايه صغيرين وأبدأي ادعكي البقعة كويس، أول ماتلاقي بقعة الحبر بدأت تروح اشطفيها وإغسلي الهدوم عادي في الغسالة هتلاقي البقعة إختفت تماماً.

طرق ازالة بقع الحبر من الملابس (الحبر الجاف):-

الحبر ده وهو اللي بنستخدمه في الأقلام العادية والنوع ده من الحبر بيكون صعب شويه في طرق إزالته لكن تقدري تتعاملي معاه بسهولة وتعالجي بقع الحبر من على الهدوم عن طريق كذا طريقة.

• ممكن تنقعي الهدوم ديه في مايه فاترة عليها فنجان صغير خل تفاح وتسيبيها 5 دقايق وبعدين إغسليها في الغسالة هتلاقي البقعة إختفت.
• كمان ممكن تحطي شوية ملح خشن على البقعة بس تكون الهدوم ناشفة مش مبلولة، بعدين تحطي عليه كام نقطة ليمون وتدعكي البقعة كويس لحد ماتختفي، طبعاً لو لقيتيها لسه موجودة إعملي نفس الطريقة تاني لحد ما البقعة تختفي تماماً.
• لو كانت الهدوم اللي عندك خامتها رقيقة زي الحرير والشيفون، أو لو كانت هدوم بيضة طبعاً مش هاتستحمل الطريقتين اللي قولنا عليهم فوق وممكن يبوظوا، عشان كده إنقعي الهدوم الرقيقة أو البيضا في نص كوباية لبن وسيبيها كام ساعة كده (من ساعتين لأربع ساعات) لحد ماتلاقي البقعة لونها قل خالص، إغسليها في الغسالة عادي جدا وهتلاقي البقعة راحت منها بشكل نهائي.

أهم حاجة لازم تخلي بالك منها عشان تقدري تتخلصي من بقع الحبر بسهولة وبسرعة إنك متأجليش غسيل البقعة، أول ماتلاقي بقع حبر على الهدوم أيا كان نوع الحبر إغسليها فوراً بأي طريقة من اللي قولتلك عليها عشان ماتبقاش بقعة صعبة عليكي بعد كده.

اعرفي أكتر عن طرق إزالة البقع في مقالتنا (طريقة التخلص من بقع الشكولاته).