طرق اختيار أشكال غرف سفرة مودرن

الديكور المودرن في السفرة إختيار مميز فعلاً وهيضيفلك لمسة بساطة ورقي وهيميز ديكور البيت اللي تقدري تعتبريه من ضمن أحلامك لأن كل جزء في البيت بيعبر عن شياكتك وذوقك، عشان كده جبنالك مجموعة من الأفكار اللي عن طريقها تقدري تختاري أشكال غرف سفرة مودرن بتصاميم أنيقة وعصرية.

كيفية اختيار غرف سفرة مودرن:-

• تقدري تقولي بصفة عامة كده أو في معظم الأحيان إن الألوان أهم حاجة عند اختيار غرف سفرة مودرن، وأهم لونين “اللون الأبيض واللون الأسود” وده لإن اللونين دول من أكتر الألوان اللي ممكن جداً تعملي معاهم ديكورات مختلفة وتعملي فيهم تصميمات متميزة وتبقى واضحة فيهم أوي ومش معنى كده إن باقي الألوان مش مناسبة بالعكس في ألوان كتيرة أوي ممكن تعمليها في السفرة المودرن زي مثلاً اللون الموف بدرجاته زي اللي في الصورة كده.
• بس زي ما إنتي عارفاه لازم هتلاقي اللون الأبيض جزء لا يتجزأ من الخشب، من ضمن مميزات السفرة المودرن إن تفاصيلها بتكون بسيطة ومفيهاش زحمة كتير يعني بمعنى أوضح بتلاقي التصميم بسيط جداً وفي نفس الوقت شيك واستايل وتقدري تستخدميها في أي مساحة سواء عندك الأوضة كبيرة أو صغيرة لأنه مناسب لجميع المساحات.
• ممكن تكون السفرة مكونة من 10 أو 8 كراسي وترابيزة السفرة نفسها طويلة أوي وده طبعاً محتاج مساحة واسعة عشان تقدري تحطي كل حاجة وماتنسيش إن ممكن يبقي فيه نيش، لكن النوعية دي من السفرة بتبقى محتاجة ديكورات بسيطة عشان هي أصلا كبيرة فأي ديكورات زيادة هتديكي مظهر مش حلو.
• وفي نوعية تانية خالص من السفرة المودرن واللي تعتبر من أحدث صيحات الموضة وهي إنك تجيبي مثلاً أربع كراسي وكنبة صغيرة كبديل لكرسين تانين ودي بقى هتبقى مناسبة أكتر لعشاق التميز زي اللي في الصورة دي.
• وفي نوعية تانية من السفرة المودرن اللي الترابيزة بتبقى فيها على شكل حلزوني أو متداخل في بعض وبأي لون تحبيه في الأبيض أو الخشب العادي اللي لونه بيج وبتبقى باقي الأوضة ألوانها متداخلة بين الأبيض والبيج اللي هو لون الخشب زي كده.
• من ضمن المعلومات المهمة اللي ضروري جداً تعرفيها عن السفرة المودرن إن لو هتجيبي نيش فبيكون مش كبير ولاعريض بس في نفس الوقت بيقضي إحتياجات بس طبعاً بشروط وأهمها إنك ماتشتريش حاجات زيادة عن إحتياجاتك وإنك في نفس الوقت تجيبي حجم الحاجات صغير وترصيه بشكل مناسب وذكي عشان يقضي كل حاجة زي اللي في الصور كده.
• وأخر حاجة عايزة أقولك عليها وإنتي بتختاري السفرة المودرن لازم يبقى في تناسق مع السجادة يعني مينفعش تختاري سجادة كلاسيك لازم تبقى مودرن.
• الستاير كمان اختاريها شفافة أو قاتمة سادة عشان تبقى أفضل ولايقة أكتر مع استايلك المودرن.

وبكده نبقى خلصنا مقالتنا عن كيفية اختيار غرف سفرة مودرن بطريقة مختلفة وتتناسب مع كل الأذواق، لو عندك أي أسئلة أو اقتراحات ابعتلنا وفريق عشانك هيرد عليكي في أقرب وقت ممكن.