صوتك وكلامك بيعبر عنك..اتيكيت الحديث

الصوت وطريقة الكلام من الحاجات المهمة جداً عشان تبدأي حديث كويس بيعبر عن شخصيتك وأسلوبك وعن مدي ثقافتك وتحضرك وعشان كده هنتكلم معاكي في مقالتنا عن اتيكيت الحديث ..

خطوات بسيطة لتعلم اتيكيت الحديث:-

• الاتيكيت بيقولك لازم تتجنبي العصبية الزائدة وغير المبررة وخليكي مبتسمة ابتسامة خفيفة لأنها بتدي إحساس بالراحة للمستمعين وإنك ودودة في كلامك.
• وفيه حاجات أساسية لازم تخلي بالك منها في اتيكيت الحديث وهي إنك تبصي في وش  الشخص اللي بتكلميه لأن لو بصيتي في مكان تاني بيدل علي البعد عن الذوق تماماً وهيسببله إحراج، كمان يكون بينكوا مسافة مناسبة لا بعيد جداً فيبقي مش سامعك ولا قريب جداً فينزعج ويبقي عايز يخلص الحديث بسرعة .
• لازم نبرة صوتك تبقى متوسطة  لأن الصوت العالي مش مناسب للستات عموماً.
• إنك تقاطعي حد وهو بيتكلم ده ما ينفعش أبداً لازم تسمعي الكلام للأخر ولو عندك تعليق ممكن تقوليه بعد ما يخلص كلامه وده هيزود من احترام الناس وتقديرهم ليكي.
• لازم تعرفي تختاري نوعية الموضوعات اللي هتتكلمي فيها وكمان لازم تكون متوافقة مع مستواهم العلمي والفكري واهتمامتهم عشان ما يملوش الحديث.
• في الإتيكيت مهم جداً تتكلمي في موضوع تدي للي قدامك فرصة يعرض وجهة نظره.
• وإنتي بتتكلمي لو غلطتي اعترفي بغلطك لأن ده هيزيد من احترام الناس لكي وهيسمعوكي باهتمام أكتر.
• اتجنبي تماماً السخرية اللي تقلل من قيمة الشخص اللي قدامك.
• من الحاجات المهمة اللي لازم نخلي بالنا منها وهي عناصر التشتيت اللي ممكن إحنا نعملها وإحنا بنتكلم فتكون سبب تشتيت لللي بيسمعنا أو يعملها المستمعين فتكون سبب لتشتيتك وتدل علي عدم اهتمامهم ، زي اللعب في أزرار القميص أو إننا نلعب في شعرنا مثلاً أو خلع النظارة ولبسها أو تحريك اليد من غير سبب أو عمل أصوات بورق قدامك أو الشخبطة في الأوراق وحاجات تانية كتير، وفي الحالات ديه لو كنتي المتحدثة حاولي تسيطري علي حركاتك لأن المستمع هيركز أكتر علي الحركات دي، ولو المستمع هو اللي بيعمل الحركات دي وأنتي المتحدثة ممكن تتوقفي شويه عن الكلام لغاية ما يبقاش فيه أي عناصر تشتتت وبعدها تكملي لأن من المهم جداً تبقي عارفه امتى تتكلمي وامتى تتوقفي عن الكلام .

كل الحاجات اللي اتكلمنا عنها مهمة جداً عشان تقدري تتكلمي بلباقة وعلى أصول الاتيكيت وكمان هتقدري تديري أي حديث من غير أي تردد ، ويكون عندك ثقة في نفسك وهي حاجات بسيطة جداً بس هتفرق كتير في نظرة الناس ليكي وهتكوني محل تقدير واحترام من كل الناس.