خلطات طبيعية للتقليل من علامات تقدم سن البشرة

مع التقدم في السن بتبدأ البشرة تفقد جزء من سماكتها وبيظهر شويه تجاعيد وترهلات علي البشرة ، لكن عشان تأخرى ظهور التجاعيد وتقللى منها لازم تهتمى ببشرتك بخلطات طبيعية مفيدة وتحاوللى تقللى من المواد الكيميائية زي الموجودة فى مستحضرات التجميل لأنها بتعجل من ظهور التجاعيد و علامات تقدم سن البشرة.

وصفات طبيعية لتأخير ظهور التجاعيد وعلامات تقدم سن البشرة قبل ظهورها :-

1- اخلطى شويه من العسل وزيت الزيتون والجليسرين لغاية ما يتكون عندك قوام متجانس ودلكى بيه بشرتك لمدة ربع ساعة مرة أو مرتين يومياً علي حسب رغبتك بيخفف من ترهل البشرة وهيخلى بشرتك نضرة وهيأخر من ظهور علامات تقدم سن البشرة .

2- اللوز والعسل من المكونات المفيدة جداً للبشرة اخلطيهم مع بعض ودلكى بيه بشرتك يومياً هتحسى بالفرق وهتكون بشرتك فاتحة وأصغر سناً.

3- اخلطى معلقة كبيرة من اللبن الرايب وضفيله الكركم شويه شويه لغاية ما تكون خليط كريمى ، دلكى بيه الوجه والرقبه وسبيه لمدة 10 دقايق بعد كده اشطفيه بمايه بارده ، الخلطة ديه مفيدة جداً للتقليل من ظهور البقع الداكنة والنمش وبتحمى بشرتك من التجاعيد و علامات تقدم سن البشرة.

4- اسلقي معلقتين كبار من العدس الأصفر واهرسيهم كويس وحطيه علي الوجه والرقبة لغاية ما ينشف بعد كده اشطفيه بالمايه البارده ، الماسك ده حلو جداً لشد ترهلات البشرة وتضييق المسام الواسعة.

5- جل الألوفيرا من الحاجات المفيدة جداً للبشرة وبتخليها شبابية ، بتجيبى الجل الموجود في الصبار وبتدلكى بيه بشرتك وبتسبيه لمدة ربع ساعة بعد كده اغسليه بمايه دافيه ومكن تضفيله زيت زيتون ومايه ورد.

6- اخلطى معلقتين كبار من زيت الزيتون مع معلقة صغيرة عصير ليمون ودلكى بيه بشرتك ورقبتك في حركات دائرية ، استمرى فعمل الماسك ده بشكل يومى فزيت الزيتون عامة مفيد جداً لتجنب ظهور التجاعيد وعلامات تقدم سن البشرة لأنه بيساعد البشرة علي إنتاج مادة الكولاجين المهمة لتنعيم البشرة ومنع ظهور التجاعيد.

7- اسلقى 3 حبات جزر واهرسيهم مع شويه من العسل لغاية ما يتكون خليط كريمى وحطيهم علي الوجه والرقبة لمدة نص ساعة وبعد كده اشطفيه بمايه دافية.

8- اسلقى تفاحة وبعد كده اهرسيها وضفيلها معلقة صغيرة من الحليب المجفف مع معلقة صغيرة عسل واستخدميه علي بشرتك وعلي الرقبة لمدة ربع ساعة يومياً ، الماسك ده مفيد جداً لتجنب ظهور التجاعيد وترطيب بشرتك.

9- مشروب العسل والزنجبيل كوبايه منه على الريق الصبح بيمنع ظهور التجاعيد لأنه غنى بمضادات الأكسدة.

10- اهرسى 5 حبات فراولة مع شويه من ماء الورد ، ووزعيه علي الوجه والرقبة وسبيه لمدة تلت ساعة.

11- الموز والأفوكادو ، الموز غنى بمضادات الأكسدة اللي بتمنع تلف الخلايا مع التقدم في السن ، والأفوكادو بالأوميجغا 3 المفيدة لصحة البشرة والجسم ، ممكن تهرسيهم مع بعض وتحطيهم على الوجه والرقبة لمدة تلت ساعة او نص ساعة وبعد كده اشطفيه بمايه بارده ، كررى الوصفة 3 مرات في الاسبوع عشان تحصلى علي أفضل النتائج.

وصفات سهلة وبسيطة ومتوفرة فى بيتك ، وعشان تكون نتايجها كويسه ومضمونة استخدميها قبل ظهور التجاعيد ، عشان تفضلك بشرتك حيوية ومحتفظة بنضارتها وشبابها ، وفيه حاجات لازم تعمليها عشان تحافظى علي بشرتك مع التقدم فى السن شوفى مقالتنا نصائح مهمة لبشرة شبابية خالية من التجاعيد.