خطوات بناء الثقة بين الزوجين

كتير من الأزواج بيعانوا من مشكلة عدم الثقة وخاصة من ناحية الزوجة بيبقى عندها دايماً شك في كلام وأفعال الزوج، لكن طبعاً كل مشكلة بيبقى ليها حل، فمن خلال مقالتنا حبينا أننا نتكلم معاكي عن خطوات بناء الثقة بين الزوجين اللي تقدري من خلالها تحافظي على بيتك وحياتك.

خطوات كسب الثقة بين الزوجين:

• أول خطوة نحب أننا ننصحك بيها لبناء الثقة مع زوجك هي حاولي إنك ماتخليش فيه أسرار بينكوا لازم يبقى في دايماً تواصل بينكوا، اتكلمي معاه عن الحاجات اللي أنتي بتحبيها أو اهتماماتك، ولازم طبعاً تشاركوا بعض في كل الآراء والمواضيع.
• خليه دايماً يبقى حاسس بإنه هو مصدر الأمان ليكي وإنه مصدر ثقة بالنسبة ليكي وإنه أهم شخص ليكي وأكتر حد بتحبي إنك تتكلمي معاه، وكمان أنتي ممكن تتكلمي معاه دايماً عن علاقتكم بالأشخاص اللي بتتعاملوا معاهم، ونحب إننا نقولك إن لازم تعملي حدود للأشخاص اللي بتتعامل معاكوا عشان عدم وجود حدود بيزود المشاكل و بيترتب على كده قلة نسبة الثقة بينكوا.
• ومن أهم الحاجات الي نحب نلفت نظرك ليها لكسب الثقة هي أن لو حصل بينكوا مشكلة وبدأ النقاش فيها ماتحوليش إنك تفضلي تتكلمي في المشاكل القديمة اللي حصلت معاكوا أو مثلاً ماتتكلميش معاه في الماضي بتاعه قبل الجواز، لأن كده ده معناه انعدام الثقة والمشاكل هتبدأ تزيد بينكوا.
• وحاجة تانية مهمة لكسب الثقة وهى المشاورة، اطلبي دايماً منه النصيحة أو المشاورة في أي حاجة تخصك وطبعاً كمان أنتي لازم تتشاوري معاه في أي حاجة تخصه.
• وأنتي بتتكلمي معاه لازم تستخدمي كلمة “إحنا” وبلاش كلمة “أنت وأنا” لأن أساس الجواز هو المشاركة ولما يبقى في حاجة عايزين تعملوها ماتقوليش أنت لازم تعمل وتحمليه المسئولية لوحده لكن أحسن قولي هنعمل أو هنتصرف وكده طبعاً الثقة هتزيد بينكوا بشكل كبير.
• لازم يبقى فيه دايماً تناسق بين الكلام والأفعال يعني ماينفعش حد منكم يقول على حاجة ومايعملهاش أو يعمل عكسها لأن ده بقى من أكتر الحاجات اللي تخلي الثقة بينكوا تنهار بسرعة جداً ولأن كده ده بيعتبر نوع من الكدبوالإحساس بعدم الأمان.
• وآخر حاجة لازم يكون في بينكوا حب ومودة واحترام لأن هي ديه أساس نجاح أي حياة بين الزوجين.

وكده نبقى خلصنا مقالتنا واتكلمنا فيها عن أهم الخطواط لكسب الثقة بين الزوجين، ولو عندك أي استفسار ممكن تبعتلنا وفريق العمل هيرود عليكي في أقرب وقت، ولو عايزة تعرفي إزاي تهتمي بزوجك بأفضل الطرق ممكن ترجعي لمقالتنا أحسن طرق لاهتمام الزوجة بالزوج.