تنسيق الالوان فى الملابس للمحجبات

لو أنتي شايفة أنك مش عارفه تلبسي شيك وعلي الموضة وأن الحجاب عاملك مشكلة ، لأ أنتي بحجابك تقدري تبقي شيك وعلي الموضة لما تختاري الألوان المناسبة ليكي وإحنا نساعدك في تنسيق الالوان واختيار الألوان المناسبة ليكي:

أفكار لـ تنسيق الالوان:

– تقدري تستخدمي الألوان الأساسية وهي الأصفر والأحمر والأزرق وممكن كمان تجمعي بينهم عشان تظهري شخصيتك الجريئة .

– فيه ألوان ما ينفعش تخلطيها مع بعضها زي الأسود مع الكحلي أو الأسود مع البني أو الأبيض مع الأوف وايت أو البني مع الرمادي لأنها غير مناسبة تماماً .

– حاولي إنك تبعدي عن الألوان الرتيبة وهي إنك تستخدمي لون واحد بس في لبسك أو لون معين بدرجات مختلفة .

– الأبيض والأسود والبيج من الألوان المحايدة اللي سهلة جداً في تنسيقها وتليق مع كل حاجة سواء كانت الألوان ديه في اللبس أو في الحجاب .

– ولو حابة يكون ليكي طلة جريئة استخدمي الألوان الصارخة زي الأصفر والأحمر والفوشيا والبرتقالي والأزرق في قطع صغيرة من ملابسك زي شنطة أو اسكارف ومثلا إذا هتلبسي لون فوشيا مع أزرق سماوي ، من الافضل أن الفوشيا تكون اسكارف أو في شنطة أو في إكسسوار .

– اختاري ألوان منسجمة مع بعضها وبتحبيها ، وعشان تختاري ألوان صح شوفي دائرة الألوان ، عشان تقدري تحددي الدرجات وتعرفي الألوان المكملة والمتتالية اللي هتساعدك كتير في تنسيق لبسك .

– خلي بالك وأنتي بتختاري لبسك ماينفعش يبقي فيه أكتر من قطعة منقوشة ، يعني لو البلوزة منقوشة لازم البنطلون والطرحة سادة والعكس لأن وجود أكتر من قطعة منقوشة هتوحي بعدم التناسق .

– ما تستخدميش ألوان كتير في اللبس بحيث تكون أكتر حاجة تلت أو أربع ألوان ويكون من ضمنها الحجاب لأن الألوان لو كتير وزاهية مش هتكون مريحة .

تنسيق الالوان في الملابس مع الطرح:

لو كنتي محجبة كلنا بنقابل مشكلة اختيار الطرحة المناسبة مع اللبس ، لكن بحجابك تقدري تبقي مميزة لما تختاري اللون المناسب اللي يليق معاكي ومع اللبس .

– لو لبسك ألوانه زاهية فمن أكتر الألوان المناسبة الأسود والأبيض والبيج ، وفي الغالب لو اللبس فاتح بيليق معاه أكتر ألوان غامقة في الطرح والعكس لو اللبس غامق بيفضل معاه طرح لونها فاتح .

– إذا مش بتحبي تلبسي ألوان كتير ممكن تكون الطرحة بلون القميص أو البلوزة لكن بدرجة أفتح أو أغمق ، وممكن كمان تكون بلون البنطلون أو الجيبة .

– كتير مننا بتروح تختار إيشاربات منقوشة لأنها بتليق جداً مع ألوان اللبس السادة لكن لو العكس لو اللبس هو اللي منقوش يبقى لازم الطرحة تكون سادة ويكون بنفس اللون اللي مش ظاهر كتير في النقوش ، ولو كانت النقوش كلها لون واحد علي أرضية سادة من الأفضل إنك تلبسي طرحة سادة لون النقوش اللي عليه .

– أما بقي لو بتحبي الألوان وتحبي دايماً تظهري بمظهر جذاب وكله حيوية وأناقة ، البسي مثلا أبيض مع أصفر أو فوشيا مع أزرق أو برتقالي مع أخضر أو بنفسجي مع أصفر أو التركواز مع الأبيض وألوان تانية كتير تقدري تنسقيها مع بعضها .

– كمان نوع الطرحة هيفرق كتير معاكي ، يعني لو هتلبسي ملابس سهرة بيناسبك طرحة شيفون أو ستان ، لو ملابس رياضية مناسب جداً الطرح القطنية وتقدري كمان تلبسيها في يومك العادي هي والشيفون .

لون الحجاب المناسب للون البشرة:

مهم جدا إنك تختاري لون الحجاب المناسب للون بشرتك مع اللبس المناسب للحجاب .

البشرة السمراء

اختاري الألوان الفاتحة عشان تظهر جمال بشرتك زي الوردي الفاتح والأزرق السماوي والأخضر الفاتح وابعدي عن الألوان الغامقة زي الأسود والبني وكمان الأحمر والفوشيا والبرتقالي والأصفر لأنها هتزيد بشرتك سمرة .

البشرة البيضاء

هيناسبك كل الألوان الزاهية وألوان الباستيل والمشرقة وكمان الألوان الغامقة هتظهر لون بشرتك أكتر .

البشرة القمحية

لو كنتي من أصحاب البشرة القمحية فأنتي محظوظة لأن عندك خيارات كتير وتقدري تختاري ألوان فاتحة أو غامقة كلها هتكون مناسبة لبشرتك.

خليكي دايماً مقتنعة إن بالحجاب تقدري تبقي مميزة ولبسك علي الموضة ، ولو عندك أي أسئلة أو اقتراحات ابعتلنا وفريق عشانك هيرد عليكي .