ترافل الشوكولاته على الطريقة الفرنسية

فرنسا كانت الموطن الأصلي اللي ظهر فيه ترافل الشوكولاته في العالم سنة 1895 وبدأ ينتشر بعد كده والناس تعرفه أكتر لما ظهر في لندن سنة 1902 في أول محل للحلويات يفتح هناك، اتطورت الوصفات بعد كده وظهرت في بلاد تانية كتير لحد ما بقى فيه 3 طرق لعمل الترافل؛ طريقة أوروبية، طريقة أمريكية وطريقة سويسرية.

ترافل الشوكولاته بتتميز بأنواعها الكتيرة ونكهاتها ووصفاتها المختلفة، وممكن تعملي بسهولة تشكيلة كبيرة منها في نفس الوقت، سواء باستخدام شوكولاته بيضا أو شوكولاته سودا.

ميزة ترافل الشوكولاته إنها من الحلويات الشهية اللي ممكن تقدميها في أي مناسبة وطريقة تحضيرها سهلة وبسيطة جداً وأحلى حاجة إنها سريعة التحضير ومش بتحتاج تستوي في الفرن.

هنقولك على وصفة سهلة من وصفات تحضير ترافل شوكولاته على الطريقة الفرنسية الأصلية وديه بتاخد وقت قليل في التحضير مش أكتر من ربع لنص ساعة بالكتير أوي، لكن اللي هياخد وقت أطول شوية إنك هتسيبيها في التلاجة حوالي ساعة قبل ما تبدأي تشكليها.

مقادير الوصفة:

• كوبايتين شوكولاته مبشورة.
• 3/4 كوباية قشطه أو كريمة.
• 1/2 معلقة عصير برتقال.
• معلقة صغيرة قشر برتقال مبشور ناعم (اختياري).
• معلقة زبدة كبيرة.
• 3 معالق كبار بودرة كاكاو أو شوكولاته سايلة (سودا أو بيضا).

طريقة عمل ترافل الشوكولاته:

• حطي كمية القشطه أو الكريمة اللي جهزتيها في حلة وسخنيها على نار حرارتها متوسطة بس خلي بالك ماتخليهاش تغلي.
• دوبي الشوكولاته المبشورة في حلة تانية صغيرة واطفي البوتجاز لما تسيح وتبقى سايلة، حطي عليها قبل ماتنشف تاني الكريمة أو القشطة في نفس الحلة وقلبي الاتنين كويس مع بعض لحد مايتخلطوا ويكونوا مزيج واحد متجانس.
• لو حابة تضيفي نكهة البرتقال ممكن تحطي على الخلطة عصير البرتقال وقشر البرتقال المبشور وتقلبيهم مع بعض كويس.
• هاتي صينية وادهنيها بالزبدة وصبي فيها الخلطة بعدين سيبيها تبرد في درجة حرارة الغرفة.
• وبعد كده حطي الصينية في التلاجة لمدة ساعة وخرجيها بعد كده وإبدأي شكلي الخلطة على شكل كور صغيرة، ممكن تستخدمي معلقة أو أي حاجة تانية عندك تعرفي تشكلي بيها.
• رشي كور ترافل الشوكولاته اللي عملتيها ببودرة الكاكاو أو بالشوكولاته السايلة وممكن تزينيها من فوق بالمكسرات أو جوز الهند، أو ترسمي عليها خطوط وأشكال بالشوكولاته السايلة.

الترافل هيبقى حلو جداً لو كلتيه مع كوباية لاتيه متلج أو كوباية كاكاو سخن، تقدري تستمتعي بيها في نهاية يومك عشان تظبطلك مودك.