بوكيه ورد العروسة وكيفية اختياره

بوكيه ورد العروسة أو زي ما كتير بيقولوا (الجيرب) من الحاجات اللي كل العرايس بتستخدمها من زمان في أفراحها ، بس ياترى تعرفي لية أصلا العروسة بتستخدم بوكيه ورد وايه السر اللي بيخلي العروسة ترميه ورا ضهرها للبنات التانية.

إحنا هنقولك ايه السر في استخدام بوكيه الورد للعرايس في الافراح:

بوكيه الورد بدأ ظهوره في فرنسا عشان كان أصحاب العريس والعروسة بيحبوا ياخدوا أي حاجة تخصهم لدرجة إنهم كانوا ممكن يقطعوا جزء من فستان العروسة أو من بدلة العريس وياخدوها عشان كانوا بيفتكروا إن ده هيجبلهم الحظ الحلو ، بس طبعاً عشان الموضوع ده كان ممكن يضايق العريس والعروسة فكروا أنهم ممكن ياخدوا حاجة بسيطة ومش هتضايق العريس أو العروسة ، فاستقروا على بوكيه الورد عشان كانوا بيعتقدوا إن ريحة الورد بتطرد الأرواح الشريرة والحظ السيء.

وبدأت الفكرة تتطور لحد ماوصلوا إن بعد ما الفرح يخلص كل البنات اللي لسه ما اتجوزوش بيقفوا ورا العروسة وهي ترميلهم بوكيه الورد واللي تاخده بيكون عليها الدور في الجواز بعد العروسة والعادة ديه طبعاً موجودة في أفراحنا لحد دلوقتي.

وعشان كده بوكيه ورد العروسة بقى حاجة أساسية في كل فرح وبقينا بنختار منه ألوان وأشكال مختلفة عشان يبين جمال فستان العروسة ويخليها شيك أكتر ، فلازم كل عروسة تدور كويس وتركز وهي بتختار شكل بوكيه ورد فرحها وإحنا هنحاول نلفت انتباهك لحاجات تخلي بالك منها وإنتي بتختاري بوكيه الورد.

كيفية اختيار بوكيه ورد العروسة:

• حاولي على قد ماتقدري تختاري بوكيه ورد يظهر جمال فستانك ويكون لايق عليكي ، يعني لو فستانك فيه تطريز كتير بلاش تختاري بوكيه الورد الكبير والمدرج عشان كده هيداري على جمال فستانك ، فأحسن بوكيه ورد المدور شوية والورد فيه كتير.
• حاجة كمان مهمة لازم تاخدي بالك منها هي إن طولك هيفرق في اختيار بوكيه الورد ، يعني لو أنتي طويلة اختاري البوكيه الطويل أو المدرج عشان هيخلي شكل فستانك حلو ، أما لو أنتي قصيرة خليكي احسن في البوكيه المدور.
• طبعاً شخصيه العروسة بتأثر في اختيارها للبوكيه يعني في اللي شخصيتها قوية ومطرقعة ممكن تختار بوكيه ورد فيه ألوان كتير وفي اللي شخصيتها هادية وخجولة ممكن تختار البوكيه العادي اللي لونه أبيض عشان كده اختاري اللي ترتاحي فيه بس لو حابة تدخلي لون تاني في بوكيه الورد مفيهاش مشكلة بالعكس ده هيضيف لمسة مختلفة على شخصيتك.
• لو هتعملي فرحك الصبح في مكان مفتوح(Open Air) اختيارك لبوكيه الورد هيبقى مختلف عشان لازم تختاري نوع يستحمل الشمس لو هتعملي الفرح في الصيف ، حاولي ساعتها تختاري الموديلات الرقيقة اللي شكل التطريز فيها بسيط.
• خلي بالك كمان إنك لازم قبل ماتختاري بوكيه الورد بتاعك تشوفي الديكور النهائي لقاعة الفرح وتحاولي تخلي البوكيه لايق عليه وخصوصا مع الكوشة.
• ممكن برضوا لو عايزة تقللي في تكاليف الفرح تعملي بوكيه ورد صناعي وهيتحط فيه شويه اكسسوارات فمش هيبان إنه صناعي.

خليكي فاكرة ان بوكيه الورد مهم ولازم تركزي فيه من غير تسرع خالص عشان هو اللي هيكمل إطلالتك المميزة يوم فرحك.