الحفاظ على الوزن خلال فترة الحمل

ستات كتير جداً في فترة الحمل بيخافوا على نفسهم من زيادة الوزن وبيحاولوا يدوروا على طريقة التخسيس الأفضل ليهم عشان كده إحنا حبينا نساعدك ونقولك على نصائح هتفيدك في الحفاظ على الوزن في فترة الحمل وهتساعدك إن وزنك مايزدش وكمان هنقولك على الوزن المثالي، دلوقتي هنعرف مع بعض شوية نصايح مهمة لازم تخلي بالك منها.

الوزن الطبيعي في فترة الحمل:

طبعاً لازم في فترة الحمل تتابعي وزنك وتخلي بالك دايماً إن مايبقاش في زيادة في الوزن، لإن الوزن الطبيعي في فترة الحمل إنه بيزيد من 10 لـ 12 كيلو يعني من كيلو لـ كيلو ونص في الشهر، ده أنسب وزن في فترة الحمل.

الأكل المفضل للحفاظ على الوزن:

• لازم كل يوم تاخدي 2100 كالوري في اليوم وفي فترة الحمل ممكن تزودي على 2100 كالوري 300 كالوري، بس طبعاً لازم كل يوم يبقى في جزء من وجبتك بيحتوي على المواد دي (اللحمة والبيض والجبنة واللبن والزبادي) ومش عايزة أكد عليكي كمان إن الكالسيوم مهم جداً ولازم تاخديه عشان طول فترة الحمل جسمك بيبقى محتاج كالسيوم أكتر بكتير من أي فترة تانية عشان الطفل بيسحب كل الكالسيوم اللي بيبقى في جسمك.
• و طبعاً لازم كمان تاكلي من الأكل اللي بيبقى فيه حديد زي العسل الأسود والفاصوليا البيضا والسبانخ وعصير البرقوق وكمان الحاجات اللي بيبقى فيها فوليك أسيد زي الخس و البروكلي والكرنب الأخضر ولإن الفوليك أسيد كمان بيعالج فقر الدم وبيحمي من تشوهات الجنين.

نصائح مهمة للحامل:

• حاولي ماتعمليش دايت قاسي في فترة الحمل بس حاولي تعملي نظام التخسيس بإنك تظبتي أكلك وبإنك تاكلي أكل بسيط بس يكون فيه كل العناصر المفيدة والمتكاملة.
• حاولي تاخدي كمية متوازنة من السكريات والنشويات اللي الجسم ممكن يكون محتاجها بس بنسب قليلة عشان وزنك مايزدش عن المعدل الطبيعي
• مهم كمان تعملي أي نشاط بسيط بس طبعاً بحساب عشان مايحصلكيش مضاعفات يعني مثلاً ممكن تتمشي ربع ساعة أو لو إنتي بتروحي جيم ممكن تستمري بس مش أكتر من ربع ساعة وياريت ترجعي للدكتور اللي متابعة معاه عشان تبقي مطمنة أكتر.
• ومن أهم النصائح اللي لازم تاخدي بالك منها كويس في فترة الحمل هي إنك تبعدي عن المشروبات الغازية وخصوصاً مشروبات الدايت لأن فيها خطر كبير على الطفل وبتسببلوا زيادة في الوزن وده طبعاً بسبب المواد الصناعية اللي فيها.

مقالتنا خلصت وحاولنا نقدملك فيها شوية نصائح ومعلومات عن الحفاظ على الوزن خلال في فترة الحمل نتمنى تعجبك وتستفيدي منها في فترة حملك، إذا عندك أي سؤال أو عندك أي إقتراح أو نصيحة جديدة تقدري تتواصلي معانا وتبعتلنا وطبعاً فريقنا هيرد عليكي في أقرب وقت ممكن.