الأكلات الممنوعة في فترة الحمل

مبروك إنتي حامل، أول ما بتسمعي الجملة دي أكتر سؤال هتسأليه لنفسك هو أنا المفروض هاكل إيه عشان اخلي طفلي صحته كويسة؟ وهتلاقي أهلك وأصحابك وقرايبك بيقدمولك كل النصايح المفيدة عن أنواع الأكل اللي المفروض تاكليه في فترة الحمل عشان تتغذي وتغذي طفلك، بس بالرغم من النصايح الممتازة والأراء المفيدة جدا اللي هتتقدملك ممكن ينسوا إن في أكل ممكن يضرك ويضر الجنين وده طبعا راجع لإنهم مش على دراية كاملة لإنه مش تخصصهم.

عشان كده حبينا نقولك على الأكلات الممنوعة عليكي أكلها في فترة الحمل، عشان تضمني كل الصحة لجنينك وتقللي من خطر الإجهاض في الشهور الأولى من الحمل.

اللحوم:

• مهم جدا تبعدي تماما في فترة الحمل عن أنواع اللحوم النية أو اللي مش مستوية سوا كامل زي اللنشون والبسطرمة والسلامي والبرجر والهوت دوج.
• عشان اللحوم اللي مش مستوية بيتكون فيها بكتريا (السالمونيلا) ودي بتأثر على صحة الجنين وممكن تسببلك إجهاض، فلو كنتي عايزة تاكلي أي لحوم لازم تتأكدي الأول إنها مستوية كويس جدا.

الجبن:

• لازم كمان تبعدي عن أكل أي نوع جبنة مصنوعة من لبن مش متبستر، زي الجبنة الفيتا والجبنة الزرقا (Blue Cheese) عشان بيكون فيها بكتريا (الليستيريا) وده نوع من البكتيريا بتسبب عيوب خلقية للجنين، مش كده وبس دي كمان بتسبب إجهاض.

الأسماك:

• بالرغم إن الأسماك والأكلات البحرية عموما مصادر ممتازة للبروتين وللأوميجا 3 اللي بيكونوا مهمين جدا لصحة الحامل والجنين، إلا إن في أنواع سمك بيكون فيها عنصر (الزئبق) والعنصر ده لما بيكون موجود بنسبة عالية في لبن الأم بيكون خطر جدا على الجهاز العصبي للطفل، عشان كده ياريت تبعدي عن أنواع الأسماك اللي فيها زئبق زي (التونة – سمك الماكريل).
• وزي ما اتفقنا لازم تبعدي عن أي حاجة مش مستوية كويس وده معناه إنك مش هينفع تاكلي سوشي، كمان إبعدي عن الأسماك المملحة زي الرنجة والفسيخ والسردين، عشان بتسبب تسمم الحمل.

الكافيين:

• لازم تبعدي طول فترة الحمل عن الشاي والقهوة والنسكافية والمشروبات الغازية، عشان نسبة الكافين فيها بتكون عالية وده بيضر جدا الجهاز العصبي للجنين وبيقلل نسبة الكالسيوم الموجودة في جسمه.

البيض الني:

• قبل ماتكلي البيض لازم تتأكدي إنه مستوي كويس جدا عشان البيض الني بيتكون فيه بكتريا (السالمونيلا) اللي زي ماقولتلك بتسبب الإجهاض.
• كمان ابعدي عن الأكلات اللي بتتعمل في البيت من البيض الني زي: المايونيز، موس الشوكولاتة، الأيس كريم.

التمر:

• بالرغم من فوائد التمر وأهميته، بينصح بالتقليل منه في أول 5 شهور من الحمل، عشان التمر منشط للرحم وممكن يسبب إجهاض.

معظم الأعشاب مش هينفع تاكليها أو تشربيها في فترة الحمل زي:

• الميرامية.
• الجرجير.
• الكرفس.
• الزنجبيل.
• القرفة.
  عشان بيزودوا إنقباض الرحم وده ممكن يعمل إجهاض خصوصا في أول 3 شهور من الحمل.

وبكده تكوني عرفتي إيه الأكلات الممنوع عليكي تاكليها في فترة الحمل، عشان تضمني كل الصحة ليكي ولجنينك.