اتيكيت تناول الطعام من البوفيه المفتوح

الاتيكيت ليه أصول وقواعد كتير لازم كلنا نهتم بيها ونطبقها في أسلوب حياتنا عشان نضمن إن حياتنا بتمشي بطريقة كويسة ومنظمة، طبعاً لازم كلنا نهتم باتيكيت الأكل وخصوصاً البوفيه المفتوح ، لازم تخلي بالك جداً لما تيجي تاكلي منه.

قواعد وأصول تناول الطعام من البوفيه المفتوح:-

• أهم قواعد الاتيكيت في الأكل هي إنك لازم لما يبدأ البوفيه المفتوح تقومي وتنضمي للناس وتاكلي، عشان أكبر غلط ممكن تعمليه إنك تفضلي في مكانك وماتقوميش لأن أصحاب العزومة هيفتكروا إنك مش عاجبك الأكل أو المكان.
• مهم جداً تحافظي على نظام الصف اللي أنتي واقفة فيه، يعني بلاش تدخلي في دور غير دورك ولازم تراعي برضه إن فيه ناس تانيه واقفة وراكي يعني ماتقفيش كتير قدام صنف واحد.
• لازم برضه تخدي بالك من اتجاه الصف وبلاش تمشي عكس الاتجاه ده، حتى لو في طبق فاتك من البوفيه وعايزة تاكليه ممكن ترجعي تاني لآخر الصف وتاخدي اللي أنتي عايزاه.
• من قواعد الاتيكيت اللي لازم تاخدي بالك منها هي إنك ماينفعش بأي حال من الأحوال تاخدي الأكل بأديكي أو وإنتي ماشية تفضلي تدوقي الأكل كله بصوابعك الطريقة دي هتخلي الناس تقرف من الأكل اللي إنتي لمستيه بإديكي وهيبقوا مضايقين منك.
• وفي الغالب في أي بوفيه بيكون في شيف واقف قدام كل صنف، فتقدري بسهولة تطلبي منه يحطلك الكمية اللي إنتي عايزاها في طبقك ولو لقتيه بيحط كميه قليلة ماتطلبيش منه يحطلك أزيد عشان ممكن يبقى عايز الصنف ده يكفي الناس كلها.
• كل حد فينا بيبقى عارف بالظبط الكمية اللي بيشبع بيها، عشان كده ماينفعش تملي الطبق على الآخر مرة واحدة التصرف ده ضد قواعد الاتيكيت تماماً، عشان كده مهم تحطي في طبقك الكمية اللي هتحتاجيها وهتشبعك ومش عيب خالص لو بعد ماخلصتي ولقيتي نفسك لسه جعانة إنك تروحي تاخدي أكل تاني، العيب إنك تملي الطبق على الآخر وماتاكليش اللي فيه.
• من ضمن القواعد المهمة في الاتيكيت إنك تختاري تاكلي الأكل السهل يعني ماتاكليش أكل يكون فيه بذر أو عظم زي مثلاً (الزيتون وأوراك الفراخ) وده عشان ممكن ماتعرفيش تخرجيها من بقك إزاي فيبقى موقف محرج ليكي.
• لو كلتي حاجة مش حلوة ومش قادرة تبلعيها أو مش بتحبيها ممكن من غير ما حد ياخد باله تخرجيها في الفوطة وتكملي أكلك عادي وتاكلي حاجة بتحبيها.
• لو في آثار أكل على بقك وعايزة تنضفيها إمسحي بقك بالراحة جداً.
• من الحاجات المهمة جداً ولازم تاخدي بالك منها في الاتيكيت إنك ماينفعش خالص تتكلمي وحش على نوع الأكل أو طعمه، عشان ده في إهانه وإحراج للناس اللي عزماكي.

دي كانت أهم النصائح لتناول الطعام من البوفيه المفتوح واللي لازم تاخدي بالك منها لو روحتي أي مكان فيه بوفيه مفتوح، عشان تفضلي دايماً محافظة على مظهرك.