أهم النصائح في تغذية الطفل

لأن مرحلة الطفولة هي أهم المراحل اللي بيتبني فيها الصحة الجسدية والعقلية للطفل وطبعاً في أمهات كتير بتلاقي صعوبة في تغذية الطفل وده بيأثر بشكل سلبي على الأطفال عشان كده حبينا نساعدك ونقولك على الطريقة السليمة في تغذية الطفل في مراحل مختلفة بداية من الولادة ولحد ما يكون عنده سنة.

تغذية الطفل من أول الولادة لحد 6 شهور:

طبعاً من أهم الحاجات في تغذية الطفل أول ما يتولد هي لبن الأم لأنه بيبقى كامل من كل العناصر الغذائية اللي بيحتاجها جسم الطفل وكمان بيدي للطفل قوة مناعة عالية جداً.

تغذية الطفل من 6 شهور الى 12 شهر:

إبدأي في المرحلة دي بإنك تدي لطفلك عناصر غذائية تانية جنب الرضاعة لأن في المرحلة دي بيبدأ جسم الطفل يحتاج لزيادة في أنواع الأكل ومن أهم أنواع الأكل اللي بنحب ننصحك بيها عشان هو الأكل الغني بالحديد والخضروات المسلوقة والمهروسة.

تغذية الطفل من 12 شهر لفوق:

في الفترة دي تقدري تأكليه من الأكل العادي اللي إنتي بتعمليه بس طبعاً بكميات بسيطة وده هيبقى مع الرضاعة، حاولي كمان تأكلي طفلك فواكه وخضروات والألبان بمشتقاتها وممكن البيض والأسماك عشان تبقى حافظتي على نظام تغذية سليم لطفلك.

نصائح في تغذية الطفل المتعب في الأكل:

• من أول النصائح اللي نحب إننا نعرضها عليكي في تغذية الطفل هي إنك لازم تكوني قدوة لطفلك يعني لازم تتعاملي معاه بشكل يحس بيه إنه ليه أهمية خلي طفلك يبقى قاعد معاكوا على السفرة وخليه ياكل من نفس الأكل اللي أنتي بتاكلي منه.
• وعشان طفلك مايحسش بالملل وهو بياكل ممكن تتكلمي معاه وتخليه مثلاً يحكليك عمل ايه في الحضانة أو يكلمك على أكتر لعبة هو بيحبها.
• أنتي ممكن كمان تخلي طفلك يبقى واقف معاكي وأنتي بتعملي الأكل وتخليه يساعدك عشان يبقى حابب أنه ياكل من الأكل اللي هو عامله بنفسه.
  
• ولازم تكوني صبورة مع طفلك وحاولي دايماً إنك تنوعي في أصناف الأكل عشان تكرار أنواع الأكل هيخليه بعد كده رافض الأكل وطبعاً ديه من الحاجات اللي بتأثر بشكل غلط على تغذية الطفل.
• وكمان عشان تعملي طريقة ذكية في تغذية طفلك، ممكن تعملي أكتر من صنف واحد في الأكل وتخلي الطفل هو اللي يختار نوع الأكل بنفسه عشان يبقى بياكل أكله وهو فرحان، بس طبعاً لازم تكوني مجهزة الأكل يعني ماينفعش تسأليه تحب تاكل ايه لأن طبعاً رده هيكون مش عايز أكل أو هيختار أكل مش صحي زي الشيبسي أو الشيكولاتة.
• وكمان إنتي ممكن تقدمي الأكل لطفلك بأشكال في الطبق زي الأشكال الكرتونية أو الرسومات اللي الطفل بيحبها عشان تجذبيه للأكل.
  

وكده نبقى خلصنا معاكي مقالتنا وقولنالك فيها على نصائح في تغذية الطفل بنتمنى إن مقالتنا تكون عجبتك وإذا عندك أي سؤال تقدري تبعتلنا وإحنا هنرد عليكي في أقرب وقت ممكن وإذا عايزة تعرفي أكتر عن التعامل مع الأطفال ممكن ترجعي لمقالتنا علاج الطفل العنيد.