أفكار لعمل مروحة صيف ملونة

الصيف السنة دي صعب جداً علينا وطبعاً بنبقى محتاجين نكسر حرارة الجو العالية دي بشوية هوا، عشان كده المروحة بتبقى شيء أساسي في الصيف، لو عندك كذا مروحة في البيت إيه رأيك لو حاولتي تغيري من شكلهم اللي اتعودتي عليه بشوية أفكار بسيطة وتخلي بيتك متجدد دايماً.

جبنالك فكرة مختلفة تقدري بيها تجددي شكل المروحة والأدوات اللي هتستخدميها عشان توصلي لنتيجة تعجبك وتغير شوية من الشكل اللي اتعودتي عليه.

الأدوات اللي هتحتاجيها لتزين المروحة:-

• 5 علب ألوان أكريليك (زي ألوان الزيت كده بس بتتخلط بالمايه وبتنشف بسرعة ودي هتقدري تلاقيها بسهولة جداً سواء عند أي محل حدايد وبويات أو مكتبة) أو لو المروحة بتاعتك فيها 3 ريش هاتي 3 علب ألوان بس.
• فرشة دهان.
• قلم رصاص.
• مسطرة.
• بكره لزق شفاف.
• سيلر مائي (هتلاقيه موجود في محلات الدهانات وده هيدي لمعة للألوان وهيخليه يثبت أكتر وفي منه كذا ماركة وكلهم بيدوا نفس النتيجة، اختاري اللي سعره مناسب ليكي).

خطوات تزيين مروحة السقف:-

• فكي ريش المروحة واغسليها كويس بالمايه والصابون عشان تشيلي أي تراب من عليها ويبقى سهل تزينيها وبعدين نشفيها كويس.
• هاتي القلم الرصاص والمسطرة وقسمي المروحة لخطوط بالعرض متساوية، بعد كده هاتي اللزق وسيبي خط وغطي الخط اللي بعديه باللزق كويس جدا.
• هاتي بقى ألوان الاكريليك وابدأي إدهني الأماكن اللي مش عليها لزق وسبيها لحد ماتنشف نهائي.
• شيلي اللزق الشفاف من على الريش وادهني الريش بالسيلر المائي وسبيهم لحد ماينشفوا.

• ركبي بقى الريش اللي لونتيها تاني في المروحة وبكده بقى عندك مروحة جميلة جداً وجديدة عشان تحاربي بيها حر الصيف.

وعشان تزيني مروحة المكتب العادية هتعملي نفس الخطوات اللي قلنالك عليها دي بس الفرق الوحيد إنك مش هتقسمي الريش باللزق الشفاف لأ انتي هتدهني كل ريشة بلون مختلف وتسيبيها لحد ماتنشف تماماً وبعدين تدهني عليها السيلر المائي وتسيبيها لحد ماتنشف وبعدين شغليها وهتشوفي بنفسك النتيجة الهايلة.

 مروحة اليد الصغيرة:-

كل اللي هتحتاجيه:-

• هاتي ورقة A4 تكون سميكة شوية واطبعي عليها أي شكل أنتي عايزاه (صورة كارتون_منظر طبيعي) أي حاجة أنتي حاباها.
• أفضلي أتني الورق بالطول كذا مره ورا بعض زي الصورة كده.

• الزقي النهايات بتاعت المروحة ببعض عشان تبقى سميكة أكتر.
• حطي في النهايات دي مشبك خشب ولفي عليها خيط ملون عشان تبقى ثابتة أكتر واربطي الخيط ده كويس في الأخر عشان ميتفكش تاني.

بالشكل ده تبقي عملتي مروحة صغيرة تقدري تستعمليها بسهولة جداً في أي وقت وأي مكان وتتجنبي حر الصيف وبرضه قدرتي تغيري شكل المراوح القديمة اللي عندك وتجددي شكل بيتك، زي ما أنتي شوفتي بإمكانيات بسيطة وأدوات سهلة أوي تقدري بيها تجددي من حاجتك القديمة وتحسي بتغيير وهتحسي بسعادة كبيرة عشان أنتي اللي عملتي التغيير ده وتعبتي فيه.