هو وهي
أسباب فتور العلاقة الزوجية وحلول للتخلص منها
فتور العلاقة الزوجية من المشاكل اللي بيعاني منها شريحة كبيرة جداً من المتزوجين والفتور بيعتبر شبح بيظهر في العلاقة الزوجية من وقت للتاني وممكن جداً يختفي نهائي ومايبقاش له وجود أو في بعض الحالات مع الأسف بيبقى مستمر بين الزوجين وبيوصل لحد الإنفصال.
أكيد الفتور ده بيكون له أسباب ومش بيبقى من طرف واحد، يعني صعب يبقى المسئولية كاملة على طرف واحد أكيد بيكون من الطرفين.
أهم أسباب فتور العلاقة الزوجية:-
- الضغوط الإقتصادية والإجتماعية اللي بتكون على الطرفين بتخليهم ينسوا معاني كتيرة حلوة ما بينهم.
- الكسل ما بين الزوجين بمعنى أصح إن الطرفين بيعتبروا إن الجواز نهاية المطاف وبالتالي بيبدأوا يهملوا في العلاقة الزوجية والمناسبات زي مثلاً إنهم ينسوا عيد الحب أو عيد جوازهم وطبعاً ده بيكون له تأثيره السلبي على الطرفين وبالأخص على الست وبيبقى سبب في فتور في العلاقة الزوجية.
- إن الزوجين مايحترموش مشاعر بعض يعني يكونوا مش فارق معاهم إن التصرف اللي بيتعمل هيزعل الطرف التاني ولا لأ.
- الملل في الحياة الزوجية وده طبعاً بسبب الروتين اليومي.
- السفر الزايد للزوج ومع الوقت الزوجة بتبدأ تتعود على عدم وجوده في الحياة وطبعاً ده بيعمل مسافة بينهم وبيبقى سبب في فتور العلاقة الزوجية.
حلول للتخلص من فتور العلاقة الزوجية:-
- إن لازم الزوجين يبذلوا مجهود عشان يكسروا الروتين يعني ممكن الطرفين في كل أجازة يحاولوا يعملوا حاجة جديدة.
- لازم الزوجين يهتموا بالمناسبات اللي بينهم ويبقى ليها إحتفال حتى لو بسيط عشان مايخسروش المشاعر اللي كانت بينهم بسبب الإهمال.
- لازم يكونوا متفائلين ويساعدوا بعض على ده جداً ومهم كمان يلعبوا رياضة وياريت تبقى رياضة مشتركة بينهم ده هيقربهم أكتر.
- مهم إنهم يعبروا عن حبهم لبعض سواء بالكلام أو بالفعل أو بهدية بسيطة مش لازم تكون في مناسبة أو حتى برسالة.
- لازم الزوجين يساعدوا بعض عى التقدم في الحياة سواء التقدم المهني أو الإجتماعي زي مثلاً إنهم يعيشوا في مستوى أحسن ويبدأوا يحوشوا ويخططوا حياتهم بشكل أفضل.
- لازم يهتموا إنهم يعملوا نشاطات جديدة عشان يكسروا الملل والروتين.
في النهاية نجاح العلاقة الزوجية ده إختيار وقرار من الزوجين وسهل جداً تحقيقة من خلال سلوكيات بسيطة الطرفين لازم يسعوا إنهم يحققوها.
Loading ...
