أحدث موضة لتصميمات دعوة الفرح

كل عروسة قبل فرحها بفترة بيبقى شاغل بالها حاجات كتير زي اختيار فستانها وشكله واستايله والمكياج هيبقى عامل عليها إزاي والقاعة إزاي هتنظمها بشكل جديد ومميز و كروت دعوة الفرح إزاي هيبقى تصميمها مش تقليدي ومميز وفي نفس الوقت رقيقة وبسيطة.

طبعاً أهلك وأصحابك مفيش شك إنهم هيبقوا عارفين ميعاد الفرح، بس برضه في معارف وأصدقاء مش مقربين أوي لازم حاجة تفكرهم أو بمعني أوضح لازم يتعزموا على الفرح بطريقة شيك عشان كده مهم تهتمي بـشل وتصميم كروت دعوة الفرح وإنها تبقى بأشكال وألوان جديدة ومميزة.

عشان كروت دعوة الفرح من العادات الجميلة اللي لسه متمسكين بيها بشكل كبير حبينا نجبلك أشكال جديدة ومميزة وفي نفس الوقت رقيقة لتصميمات كروت دعوة الفرح.

أفكار جديدة لشكل كروت دعوة الفرح:-

• ممكن تغيري من الشكل المربع أو المستطيل التقليدي وتعملي كروت دعوة الفرح على شكل دايرة، كمان ممكن تغيري من اللون الأبيض والأوف وايت أو زي ماكتير بيقوله عليه (الكريمي) التقليديين في تصميمات دعوات الفرح وتعملي مثلاً أبيض في أحمر أو في أي لون تاني تكسري بيه القاعدة.

• تغيير الشكل مطلوب برضه عشان كده ممكن تختاري شكل كروت الدعوة تكون مفرغة كده وتتفتح بسهولة زي اللي في الصورة.

• الأشكال الـ 3D موضة جداً ومميزة جداً في تصميم كروت دعوة الفرح ممكن كمان تختاري منها الشكل اللي يناسبك وتحسي إنه هيزيد من جمال اليوم.

• ممكن تعمليها على شكل الظرف اللي متعودين علي بس تجددي وتفرغي المكان اللي مكتوب فيه تاريخ الفرح، هتبقى فكره جديدة زي اللي في الصورة دي والدايرة ممكت تخليها بأي لون تحبيه أو مثلا من نفس لون الكوشة زي مثلا البينك أو الموف.

• فيه كمان فكرة جديدة وهي إنك تعملي الدعوات اللي هتبعتيها لأهل العريس وأصحابه علي شكل بدلة عريس واللي هتبعتيها لأهلك وأصحابك على شكل فستان العروسة، أو الدعوة نفسها تبقى جامعة مابين الفستان والبدله زي بالظبط الجيست بوك”الكتاب اللي كل المعزومين بيكتبوا فيه كلمة ليكوا عشان تبقى ذكرى”.

دي كانت شوية أفكار جديدة تقدري تعمليها عشان تختاري شكل كروت دعوة الفرح اللي هتميز اليوم ده خصوصاً لو كنتي عملاها بشكل مميز وفيه فكرة جديدة، بس أهم حاجة لازم تاخدي بالك كويس من نوع الخط اللي هتتكتب بيه الدعوات وحجمه ولازم كمان تشوفي نسخة منها قبل طبع الكمية كلها عشان تتجنبي أي غلطات أو أي تكلفة مادية ممكن تبقي محتاجها في حاجة تانية.