أحدث الوان صبغات الشعر 2018

مش بس لبسك هو اللي لازم يكون عصري وعلي الموضة شعرك كمان شئ أساسي عشان تكون طلتك كاملة وأنيقة، موضة السنة اللي فاتت في الألوان كانت جريئة جداً زي اللون الأزرق والبنفسجي والاخضر لكن موضة 2018 ألوان هادية وطبيعية أكتر، تعالي نشوف ايه الجديد في الوان صبغات الشعر.

كان من فترة تلوين أطراف الشعر بلون مختلف موضة ولسه هتكون مكملة معانا لـ 2018 وكمان تداخل لونين مع بعض موضة 2018 لأنه بيدي إحساس بالأناقة وكأن الشعر طبيعي، تعالي نشوف ايه هي أحدث الوان صبغات الشعر لـ 2018.

اللون الدهبي المائل للوردي:

لأن اللون الأشقر لوحده مابقاش موضة ، وبقي البديل اللون الدهبي مع الوردي وممكن يكون فيه تدريجات في اللونين بحيث يكون الشعر شكلة طبيعي أكتر ، وممكن تستخدمي الأشقر برضه إذا كنتي بتحبيه لكن ممكن تخليه علي الموضة بإضافة بعض خصلات البلاتنيوم بطريقة متداخلة بحيث يدي الشكل الطبيعي.

الأشقر الزبدي:

بيكون اللون مائل للون الزبدة ، الموضة بتاعت اللون ده ما بتخلصش ولسه مستمرة لـ 2018 ، وممكن تغمقيه أو تفتحيه حسب الدرجة اللي تحبيها وتليق مع لون بشرتك.

الفضي الميتالك:

اللون ده مش موجود في الوان صبغات الشعر بس ده بقي كمان موجود في اللبس وطلاء الاظافر ، وكمان معاه الدهبي والنحاسي ، لأن الالوان ديه بتبقي تغيير وبتدي إحساس بالجرأة والأناقة.

النحاسي الدافئ:

لون مختلف وحلو بكل درجاته وبيدي إحساس بالفخامة مع الغموض والسحر ، ومناسب جداً لأصحاب البشرة البيضاء.

الكراميل:

من درجات اللون البني الفاتح ، وبيدي إحساس بالبساطة والأناقة والدفء وكمان بيليق مع كل الوان البشرة ، وبيكون مناسب لكل الأوقات والمناسبات وموضته مش بتروح أبداً .

اللون الاحمر الغامق:

من الألوان المليانة بالغموض والسحر والجرأة ، وكمان بيكون مناسب مع أصحاب البشرة السمراء.

الشيكولاتة الدافئة:

من الألوان الدافية والجميلة اللي تناسب موسم الشتا ، وهتديكي مظهر أنيق وجذاب وهتكوني شيك جداً في كل الأوقات ، زي لون الكراميل.

الميتالك الملون:

هيديكي مظهر نشيط ومليان حيوية لأن مش كتير يقدر يستخدم الألوان ديه زي الأزرق والبنفسجي.

اللافندر والوردي:

وهي الدرجات الباهتة من الوردي والبنفسجي ، ألوان مختلفة وجريئة وممكن تخلطي اللونين مع بعض عشان يديكي مظهر طبيعي وجذاب.

الزهري الباستيل:

لو حابة تكون طلتك جريئة ومختلفة وبتحبي التغيير يبقي لازم تجربي اللون ده ، هيديكي إحساس مختلف وشعور بالجرأة والحيوية والقوة.

خليكي دايماً مميزة وأنيقة وغيري في لون شعرك من وقت للتاني عشان تحسي بالفرق والتجديد ، لأن التغيير بيكون حاجة حلوة جداً زي بالظبط تغيير استايل اللبس.
ولو عندك أسئلة أو اقتراحات ابعتلنا وفريق عشانك هيرد عليكي.